ഡാമിന് താഴെ കുളിക്കാനിറങ്ങിയ വിദ്യാര്‍ഥിയുടെ മാല കരമനയാറ്റിയാറ്റില്‍ കാണാതായി, മുങ്ങിയെടുത്ത് ഫയര്‍ഫോഴ്സ്
തിരുവനന്തപുരം: അരുവിക്കര ഡാമിന് താഴെ തടയണയില്‍ കുളിക്കാനിറങ്ങിയ ഐടിഐ വിദ്യാർഥിയുടെ മാല കരമനയാറ്റില്‍ കാണാതായി.തിരുവനന്തപുരം യൂണിറ്റില്‍ നിന്നും സ്കൂബാ ടീം എത്തി മുക്കാല്‍ മണിക്കൂറോളം പരിശോധന നടത്തിയ ശേഷമാണ് മാല കണ്ടെടുക്കാനായത്. ഇന്നലെ വൈകിട്ടായിരുന്നു സംഭവം.
വിദ്യാർഥിയായ സുബിനും സുഹൃത്തുക്കളും ചേർന്ന് കുളിക്കുന്നതിനിടെയാണ് സുബിന്‍റെ ഒരു പവനോളം വരുന്ന മാല ആറ്റില്‍ കാണാതായത്. വിദ്യാർഥികള്‍ പ്രദേശത്ത് തെരച്ചില്‍ നടത്തിയെങ്കിലും മാല കിട്ടിയില്ല. ഒഴുക്കുണ്ടായിരുന്നതിനാല്‍ കൂടുതല്‍ ശ്രമം നടത്താതെ ഫയർഫോഴ്സിനെ വിളിക്കുകയായിരുന്നു.
തിരുവനന്തപുരം സ്കൂബാ ടീം അംഗങ്ങള്‍ സുഭാഷിന്‍റെ നേതൃത്വത്തില്‍ ഡ്രൈവർമാരായ സുജയൻ, സന്തോഷ്‌, പ്രതോഷ്, വിഷ്ണുനാരായണൻ, രാഹുല്‍ എന്നിവർ ചേർന്നാണ് ഒഴുക്കുള്ള സ്ഥലത്തെ പരിശോധനയ്ക്കൊടുവില്‍ മാല മുങ്ങിയെടുത്തു നല്‍കിയത്. എങ്ങനെ വിവരം വീട്ടില്‍ പറയും എന്ന് കരുതി ആശങ്കയിലായിരുന്ന സുബിന് മാല കിട്ടിയപ്പോഴാണ് ആശ്വാസമായത്.