രാത്രി പതിവില്ലാത്ത വിധം തുടര്‍ച്ചയായുള്ള അലര്‍ച്ച, രാവിലെ സ്ഥലം പരിശോധിച്ച ഉദ്യോഗസ്ഥര്‍ കണ്ടത് കാട്ടാനകളുടെ ജഡം
മലപ്പുറം: വൈറസ് ബാധയേറ്റ് രണ്ടിടങ്ങളിലായി രണ്ട് കാട്ടാനകള്‍ ചെരിഞ്ഞ നിലയില്‍ കണ്ടെത്തി. വഴിക്കടവ് റേഞ്ച് വനത്തില്‍ രണ്ടിടങ്ങളിലായാണ് രണ്ട് കാട്ടാനകളെ ചെരിഞ്ഞ നിലയില്‍ കണ്ടെത്തിയത്.മരുത കൊക്കോ എസ്റ്റേറ്റിന് സമീപവും കാരക്കോട് പുത്തരിപ്പാടം മാടമ്ബിച്ചോലക്ക് സമീപവും വനത്തിലാണ് ആനകള്‍ ചെരിഞ്ഞ നിലയില്‍ കണ്ടത്. കൊക്കോ എസ്റ്റേറ്റിന് സമീപം 20 വയസുള്ള പിടിയാനയാണ് ചെരിഞ്ഞത്. നാലു ദിവസം പഴക്കമുണ്ട്. പുത്തരിപ്പാടത്ത് സ്വകാര്യ വ്യക്തിയുടെ സ്ഥലത്തുനിന്ന് 200 മീറ്റർ അകലെ മാടമ്ബിച്ചോലക്ക് സമീപം 10 വയസ്സുള്ള കുട്ടികൊമ്ബനാണ് ചെരിഞ്ഞത്.കഴിഞ്ഞ ദിവസം രാത്രി ഇവിടെനിന്ന് തുടർച്ചയായുള്ള ആനയുടെ അലർച്ച കേട്ടത്തിനെ തുടർന്ന് ഇന്നലെ രാവിലെ വനപാലകർ സ്ഥലം പരിശോധനക്കിടെയാണ് ജഡം കണ്ടത്.
രണ്ട് ആനകളുടെയും മരണ കാരണം വൈറസ് രോഗം ബാധിച്ചതാണെന്നാണ് പ്രാഥമിക പോസ്റ്റേ്മാർട്ടത്തില്‍ പറയുന്നത്. കൊക്കോ എസ്റ്റേറ്റിന് സമീപമുള്ള പെണ്ണാനയുടെ ആന്തരികാവയവങ്ങള്‍ക്ക് കേടുപാടുകളുണ്ട്. വഴിക്കടവ് റേഞ്ച് ഫോറസ്റ്റ് ഓഫിസർ ഷെരീഫ് പനോലൻ, സെക്ഷൻ ഫോറസ്റ്റ് ഓഫിസർമാരായ കെ ആർ രാജേഷ്, ലാല്‍ വി നാഥ്, ബീറ്റ് ഫോറസ്റ്റ് ഓഫിസർമാരായ പി എം അയ്യൂബ്, ജെ ജിസ്‌ന, ജയരാജൻ, സി അഭിലാഷ്, ബിജേഷ് എന്നിവരടങ്ങുന്ന സംഘം സ്ഥലത്തെത്തി. വനം വെറ്ററിനറി സർജൻമാൻമാരായ ഡോ. എസ് ശ്യാം, ഡോ. മുഹമ്മദലി, ഡോ. റിനു എന്നിവരുടെ നേതൃത്വത്തില്‍ പോസ്റ്റ്മാർട്ടം നടപടി പൂർത്തീകരിച്ച്‌ ജഡങ്ങള്‍ രണ്ടും വനത്തില്‍ തന്നെ സംസ്‌കരിച്ചു.