സീബ്ര ലൈനില്‍കൂടി റോഡ് മുറിച്ച്‌ കടക്കുന്നതിനിടെ കാറിടിച്ചു, സൗദിയില്‍ മലയാളിക്ക് ദാരുണാന്ത്യം
റിയാദ്: സൗദി കിഴക്കൻ പ്രവിശ്യയിലെ അല്‍ ഖോബാറില്‍ റോഡ് മുറിച്ചുകടക്കുന്നതിനിടെ വാഹനമിടിച്ച്‌ മലയാളിക്ക് ദാരുണാന്ത്യം.കൊല്ലം കൊട്ടാരക്കര പൂവാറ്റൂർ സ്വദേശി ഗോപി സദനം വീട്ടില്‍ ഗോപകുമാർ (52) ആണ് മരിച്ചത്. വെള്ളിയാഴ്ച്ച വൈകിട്ട് നാലിന് തുഖ്ബ സ്ട്രീറ്റ് 20ല്‍ റോഡിലെ സീബ്ര ലൈനില്‍ കൂടി മറുഭാഗത്തേക്ക് പോകാൻ ശ്രമിക്കവേ എതിരെ വന്ന കാർ ഇടിക്കുകയും ശരീരത്തിലൂടെ കയറിയിറങ്ങുകയുമായിരുന്നു. കാർ നിർത്താതെ കടന്നുകളഞ്ഞു.
തുഖ്ബയില്‍ എ.സി വർക്ക് ഷോപ്പ് നടത്തിവരികയായിരുന്നു ഗോപകുമാർ. 16 വർഷത്തോളമായി ദമ്മാമില്‍ പ്രവാസിയാണ്. ഗോപിനാഥ് പിള്ള-പൊന്നമ്മ ദമ്ബതികളുടെ മകനാണ്. ഭാര്യ: ശ്രീജ, മക്കള്‍: ഗണേഷ്, കാവ്യ. മൃതദേഹം നാട്ടില്‍ കൊണ്ടുപോകാനുള്ള നിയമ നടപടിക്രമങ്ങള്‍ക്ക് കെ.എം.സി.സി തുഖ്ബ പ്രസിഡന്റ് ഉമർ ഓമശ്ശേരി, ഖോബാർ പ്രസിഡന്റ് ഇഖ്ബാല്‍ ആനമങ്ങാട്, വെല്‍ഫെയർ വിഭാഗം ചെയർമാൻ ഹുസൈൻ നിലമ്ബൂർ എന്നിവർ രംഗത്തുണ്ട്.