പ്ലാറ്റിനം മോതിരവും സില്‍വര്‍ വളയും; കാര്‍ത്തിക് സൂര്യക്ക് മഞ്ജു പിള്ളയുടെ വിവാഹസമ്മാനം
ടെലിവിഷന്‍ അവതാരകന്‍, വ്‌ളോഗര്‍ എന്നീ നിലകളിലെല്ലാം പ്രശസ്തനായ ആളാണ് കാര്‍ത്തിക് സൂര്യ. അവതരണം കൊണ്ടും സംസാര രീതി കൊണ്ടും വളരെ പെട്ടന്ന് സോഷ്യല്‍ മീഡിയ കീഴടക്കാന്‍ കാര്‍ത്തിക്കിന് സാധിച്ചിട്ടുണ്ട്. നാളെയാണ് (ജൂലൈ 11) കാര്‍ത്തിക്കിന്റെ വിവാഹം. അമ്മാവന്റെ മകള്‍ വര്‍ഷയാണ് വധു. വിവാഹവുമായി ബന്ധപ്പെട്ട വിശേഷങ്ങള്‍ താരം തന്റെ യൂട്യൂബ് ചാനലിലൂടെ കഴിഞ്ഞ കുറച്ചു നാളുകളായി പങ്കുവെയ്ക്കാറുണ്ടായിരുന്നു. വിവാഹത്തോടനുബന്ധിച്ച് നടിയും കാര്‍ത്തിക് സ്വന്തം ചേച്ചിയെപ്പോലെ കരുതുന്നയാളുമായ മഞ്ജു പിള്ള നല്‍കിയ സമ്മാനത്തെക്കുറിച്ചാണ് താരം പുതിയ വ്‌ളോഗില്‍ സംസാരിക്കുന്നത്. മഞ്ജു പിള്ളയുടെ മകള്‍ ദയയും കാര്‍ത്തിക്കിനുള്ള വിവാഹസമ്മാനം വാങ്ങാന്‍ എത്തിയിരുന്നു.
ഒരു പ്ലാറ്റിനം മോതിരവും സില്‍വര്‍ വളയുമാണ് മഞ്ജു പിള്ള കാര്‍ത്തിക്കിന് സമ്മാനമായി നല്‍കിയത്. ആനവാല്‍ മോതിരം വാങ്ങാനാണ് എത്തിയതെങ്കിലും പിന്നീട് തീരുമാനം മാറ്റി പ്ലാറ്റിനം മോതിരം വാങ്ങുകയായിരുന്നു. പുരുഷന്‍മാരുടെ കയ്യില്‍ പ്ലാറ്റിനം മോതിരം കിടക്കുന്നത് കാണാന്‍ ഒരു ക്ലാസി ലുക്ക് ആണെന്നായിരുന്നു മഞ്ജു പിള്ളയുടെ പ്രതികരണം. വള വേണമെന്ന കാര്യം കാര്‍ത്തിക് ഇടക്കിടെ പറയാറുള്ളതായിരുന്നു എന്നും മഞ്ജു പിള്ള കൂട്ടിച്ചേര്‍ത്തു. ആനവാല്‍ മോതിരം വില്‍ക്കാന്‍ പറ്റില്ലെന്നും ഇതാകുമ്പോള്‍ വില്‍ക്കാമല്ലോ എന്നുമായിരുന്നു തമാശരൂപേണ കാര്‍ത്തിക് പറഞ്ഞത്.
കാര്‍ത്തിക് സൂര്യ പങ്കുവെച്ച സേവ് ദ ഡേറ്റ് വീഡിയോയും ചിത്രങ്ങളും സോഷ്യല്‍ മീഡിയയില്‍ ശ്രദ്ധ നേടിയിരുന്നു. രണ്ട് വര്‍ഷം മുമ്പ് കാര്‍ത്തികിന് മറ്റൊരു വിവാഹം ഉറപ്പിച്ചിരുന്നു, പിന്നീട് ഈ വിവാഹം മുടങ്ങിപ്പോകുകയും ചെയ്തിരുന്നു. പിന്നീട് വീട്ടുകാരാണ് വര്‍ഷയെ കാര്‍ത്തികിന് വേണ്ടി കണ്ടെത്തിയത്.നാളെയാണ് (ജൂലൈ 11) കാര്‍ത്തിക്കിന്റെ വിവാഹം.