അഞ്ച് വര്‍ഷം, 350 കോടിയിലേറെ രൂപ; പ്രധാനമന്ത്രിയുടെ വിദേശയാത്രാ ചിലവ് കണക്കുകള്‍ പുറത്ത്
ന്യൂഡല്‍ഹി: പ്രധാനമന്ത്രി നരേന്ദ്ര മോദിയുടെ വിദേശയാത്രകള്‍ക്ക് ചിലവായ തുകയുടെ പൂർണവിവരങ്ങള്‍ പുറത്തുവിട്ട് കേന്ദ്രസർക്കാർ.രാജ്യസഭയില്‍ തൃണമൂല്‍ കോണ്‍ഗ്രസ് എംപി ഡെറിക്ക് ഓ ബ്രെയിനിന്റെ ചോദ്യത്തിന് മറുപടിയായി കേന്ദ്രമന്ത്രി കീർത്തി വർധൻ സിങ് ആണ് കണക്കുകള്‍ പുറത്തുവിട്ടത്. ഇത് പ്രകാരം അഞ്ച് വർഷത്തെ വിദേശയാത്രകള്‍ക്ക് ചിലവായത് 362 കോടി രൂപയാണ്.
2021 മുതല്‍ 2025 വരെയുള്ള കാലയളവില്‍ പ്രധാനമന്ത്രി ചെയ്ത യാത്രകള്‍ക്ക് ചിലവായ തുകയാണ് 362 കോടി രൂപ. ഇതില്‍ 2025ല്‍ മാത്രം 67 കോടി രൂപയാണ് ഇതുവരെ ചിലവായത്. പ്രധാനമന്ത്രിയുടെ ഫ്രാൻസ് യാത്രയായിരുന്നു ഈ വർഷത്തെ ഏറ്റവും ചിലവേറിയ യാത്ര. 25 കോടി രൂപ. 16 കോടി ചിലവായ യുഎസിലേക്കുള്ള യാത്രയാണ് രണ്ടാമത്.2024ല്‍ പ്രധാനമന്ത്രി 16 രാജ്യങ്ങള്‍ സന്ദർശിച്ചപ്പോള്‍ ആകെ ചിലവായ തുക 109 കോടി രൂപയാണ്. 2023ല്‍ 93 കോടി രൂപയും 2022, 2021 എന്നീ വർഷങ്ങളില്‍ യഥാക്രമം 55.82 കോടി, 36 കോടി എന്നിങ്ങനെയാണ്. 2023ലെ യുഎസ് യാത്രയ്ക്ക് 22 കോടി രൂപയാണ് ചിലവായത്. ജനങ്ങളുമായി ആശയവിനിമയം, പരസ്യങ്ങള്‍, ബ്രോഡ്‌കാസ്റ്റ് ചിലവുകള്‍ എല്ലാം ചേർത്താണ് മൊത്തം ചിലവുകള്‍ കണക്കാക്കുക.