എവര്‍ട്ടണെതിരെ സമനില; പ്രീമിയര്‍ ലീഗ് സമ്മര്‍ സീരീസ് കിരീടം നേടി മാഞ്ചസ്റ്റര്‍ യുണൈറ്റഡ്
പ്രീമിയർ ലീഗ് സമ്മർ സീരീസ് ചാംപ്യന്മാരായി മാഞ്ചസ്റ്റർ യുണൈറ്റഡ്. എവർട്ടണെതിരായ മത്സരം സമനിലയില്‍ കലാശിച്ചതിന് ശേഷമാണ് യുണൈറ്റഡ് കിരീടം നേടിയത്.എവർട്ടണും യുണൈറ്റഡ‍ും രണ്ട് വീതം ഗോളുകളടിച്ച്‌ പിരിഞ്ഞു. ഇതോടെ പോയിന്റ് പട്ടികയില്‍ ഒന്നാമതെത്തിയ യുണൈറ്റഡ് കിരീടം സ്വന്തമാക്കുകയായിരുന്നു.
ആവേശം നിറഞ്ഞ പോരാട്ടത്തില്‍ ഇരു ടീമുകളും ഒപ്പത്തിനൊപ്പം നിന്നു. മത്സരത്തിന്റെ 19-ാം മിനിറ്റില്‍ തന്നെ യുണൈറ്റഡ് ലീഡെടുത്തു. പെനാല്‍റ്റിയിലൂടെ ബ്രൂണോ ഫർണാണ്ടസാണ് യുണൈറ്റഡിന്റെ ആദ്യഗോള്‍ നേടിയത്. എന്നാല്‍ ആദ്യ പകുതി അവസാനിക്കുന്നതിന് മുമ്ബ് എവർട്ടണ്‍ ഒപ്പംപിടിച്ചു. 40-ാം മിനിറ്റില്‍ ഇലിമാൻ എൻഡിയായെയാണ് എവർട്ടണിന് വേണ്ടി സമനില ഗോള്‍ നേടിയത്.
69-ാം മിനിറ്റില്‍ മേസണ്‍ മൗണ്ടിന്റെ കിടിലൻ ഫിനിഷ് യുണൈറ്റഡിന് വീണ്ടും ലീഡ് സമ്മാനിച്ചു. എന്നാല്‍ 75-ാം മിനിറ്റില്‍ ബ്രാൻഡൻ ഹെവന്റെ ഓണ്‍ ഗോള്‍ എവർട്ടണിനെ വീണ്ടും സമനിലയിലെത്തിച്ചു. ഇതോടെ ഇരുടീമുകളും ഓരോ പോയിന്റ് വീതം പങ്കുവെച്ചുപിരിഞ്ഞു.