2030-ലെ കോമണ്‍വെല്‍ത്ത് ഗെയിംസിന് ആതിഥ്യം വഹിക്കാനുള്ള ഇന്ത്യയുടെ നീക്കത്തിന് പച്ചക്കൊടി
ന്യൂഡല്‍ഹി: 2030-ലെ കോമണ്‍വെല്‍ത്ത് ഗെയിംസിന് ആതിഥേയത്വം വഹിക്കാൻ താത്പര്യ പത്രം സമർപ്പിക്കുന്നതിന് ഇന്ത്യൻ ഒളിമ്ബിക് അസോസിയേഷൻ (IOA) അംഗീകാരം നല്‍കി.2030-ലെ കോമണ്‍വെല്‍ത്ത് ഗെയിംസിന് ആതിഥേയത്വം വഹിക്കുന്ന നഗരം അഹമ്മദാബാദ് ആകാനാണ് സാധ്യതയെന്ന് ഇന്ത്യൻ ഒളിമ്ബിക് അസോസിയേഷൻ വൃത്തങ്ങളെ ഉദ്ധരിച്ച്‌ എ.എൻ.ഐ റിപ്പോർട്ട് ചെയ്തു.
ഓഗസ്റ്റ് 31-നകം നിർദ്ദേശം സമർപ്പിക്കും. നവംബറില്‍ ആതിഥേയ നഗരത്തെ തീരുമാനിക്കുമെന്നാണ് പ്രതീക്ഷിക്കുന്നത്. അഹമ്മദാബാദിനൊപ്പം ഭൂവനേശ്വറും ആതിഥേയത്വം വഹിക്കാൻ താത്പര്യം അറിയിച്ചിട്ടുണ്ട്.
കോമണ്‍വെല്‍ത്ത് ഗെയിംസ് ഫെഡറേഷൻ (സിജിഎഫ്) അധികൃതർ ഈ വർഷം ആദ്യം ഇന്ത്യയില്‍ സന്ദർശനം നടത്തിയിരുന്നു. ഭൂവനേശ്വറിലും അഹമ്മദാബാദിലും സംഘം പരിശോധന നടത്തുകയുണ്ടായി.
കോമണ്‍വെല്‍ത്ത് സ്പോർട്സിന്റെ ഗെയിംസ് ഡയറക്ടർ ഡാരൻ ഹാളിന്റെ നേതൃത്വത്തിലുള്ള ഒരു സംഘം അടുത്തിടെ അഹമ്മദാബാദിലെത്തി വേദികള്‍ പരിശോധിക്കുകയും ഗുജറാത്ത് സർക്കാർ അധികൃതരുമായി കൂടിക്കാഴ്ച നടത്തുകയും ചെയ്തിരുന്നു.
2030-ലെ കോമണ്‍വെല്‍ത്ത് ഗെയിംസ് ഇന്ത്യയെ സംബന്ധിച്ചിടത്തോളം വളരെ പ്രധാനപ്പെട്ടതാണ്. കാരണം ന്യൂഡല്‍ഹി കോമണ്‍വെല്‍ത്ത് ഗെയിംസിന് 20 വർഷം തികയുന്നു എന്നതാണ് പ്രധാന പ്രത്യേകത. 2010ലായിരുന്നു ഇന്ത്യ ആദ്യമായി കോമണ്‍വെല്‍ത്ത് ഗെയിംസിന് ആതിഥേയത്വം വഹിച്ചത്. ഈ ഗെയിംസ് പിന്നീട് അഴിമതി ആരോപണങ്ങളാല്‍ കുപ്രസിദ്ധി നേടുകയും ചെയ്തിരുന്നു.
ഇതിനിടെ ഇന്ത്യ 2036-ലെ ഒളിമ്ബിക്സിന് ആതിഥേയത്വം വഹിക്കാനുള്ള നീക്കങ്ങളും ഊർജിതപ്പെടുത്തിയിട്ടുണ്ട്.