ഹാളണ്ടിന്‍റെ ഡബിളിൽ ജയിച്ചു തുടങ്ങി സിറ്റി, സൂപ്പര്‍ സണ്‍ഡേയില്‍ ഇന്ന് മാഞ്ചസ്റ്റർ യുണൈറ്റഡ്-ആഴ്സണല്‍ പോരാട്ടം
മാഞ്ചസ്റ്റര്‍: ഇംഗ്ലീഷ് പ്രീമിയർ ലീഗിൽ മുന്‍ ചാമ്പ്യൻമാരായ മാഞ്ചസ്റ്റർ സിറ്റിക്ക് ഗംഭീര തുടക്കം. കഴിഞ്ഞ സീസണിലെ നിരാശജനകമായ പ്രകടനം മറികടന്ന് സിറ്റി വുൾവ്സ് എഫ്സിയെ എതിരില്ലാത്ത നാല് ഗോളിന് തകർത്ത് ജയിച്ചു തുടങ്ങി. സൂപ്പര്‍ താരം ഏർലിംഗ് ഹാളണ്ട് നേടിയ ഇരട്ട ഗോളുകളാണ് സിറ്റിയുടെ ജയം ആധികാരികമാക്കിയത്. 34, 61 മിനുട്ടുകളിലായിരുന്നു ഹാളണ്ടിന്‍റെ ഗോളുകൾ. പുതിയ താരങ്ങളായ റെയിൻഡേഴ്സും റൊമെയ്ൻ ഷെർക്കിയും മാഞ്ചസ്റ്റർ സിറ്റിക്കായി വല കുലുക്കി. വുൾവ്സ് എഫ്സി ഓൺ ടാർജറ്റിലേക്ക് മൂന്ന് ഷോട്ടുകൾ തൊടുത്തെങ്കിലും ഒന്നും ലക്ഷ്യം കണ്ടില്ല.
സൂപ്പര്‍ സണ്‍ഡേയില്‍ വമ്പൻ പോരാട്ടങ്ങള്‍
ഇംഗ്ലീഷ് പ്രീമിയർ ലീഗിലെ സൂപ്പര്‍ സണ്‍ഡേയില്‍ ഇന്ന് വമ്പൻ പോരാട്ടങ്ങളുണ്ട്. ആദ്യ മത്സരത്തിൽ മാഞ്ചസ്റ്റർ യുണൈറ്റഡ് ആഴ്സണലുമായി ഏറ്റുമുട്ടും. ഓൾഡ് ട്രാഫോർഡിൽ ഇന്ത്യൻ സമയം രാത്രി 9 മണിക്കാണ് മത്സരം. തുടർച്ചയായ മൂന്ന് സീസണുകളിൽ കൈ അകലെ നഷ്ടമായ കിരീടം ഇത്തവണ തിരിച്ചുപിടിക്കാൻ ഇറങ്ങുന്ന ഗണ്ണേഴ്സ് തകർപ്പൻ ജയമാണ് ലക്ഷ്യമിടുന്നത്. കഴിഞ്ഞ സീസണിൽ കനത്ത തിരിച്ചടി നേരിട്ട യുണൈറ്റഡ് ഇത്തവണ ഫോം വീണ്ടെടുക്കുമെന്ന പ്രതീക്ഷയിലാണ് ആരാധകർ.
ചെൽസിയും ഇന്ന് ആദ്യ മത്സരത്തിന് ഇറങ്ങും. വൈകിട്ട് 6.30ന് നടക്കുന്ന മത്സരത്തിൽ ക്രിസ്റ്റൽ പാലസാണ് എതിരാളികൾ. ഇതേ സമയം നടക്കുന്ന മറ്റൊരു മത്സരത്തിൽ നോട്ടിംഗ്ഹാം ഫോറസ്റ്റ് ബ്രെൻഡ്ഫോർഡുമായി ഏറ്റുമുട്ടും.