പുലർച്ചെ കൂരിയാട് അടിപ്പാതയില്‍ കാറിൽ 3 പേർ; പൊലീസിന് തോന്നിയ സംശയം, മൊത്തം പരിശോധിച്ചു, പിടികൂടിയത് 54.08 ഗ്രാം എംഡിഎംഎ
മലപ്പുറം: വിപണിയില്‍ രണ്ടക്ഷം രൂപ വിലവരുന്ന 54.08 ഗ്രാം എം. ഡി.എം.എയുമായി മൂന്ന് യുവാക്കളെ ജില്ലാ ആന്റി നര്‍കോട്ടിക് ടീം പിടികൂടി. പ്രതികളില്‍നിന്ന് ഒരു ലക്ഷത്തി അയ്യായിരം രൂപയും പിടിച്ചെടുത്തു. വേങ്ങര, കൂരിയാട് എന്‍എച്ച് 66 ദേശീയപാത കേന്ദ്രീകരിച്ച് പറമ്പില്‍ പീടിക സ്വദേശി ആഷിക് (33), കുന്നുംപുറം സ്വദേശികളായ സുധിന്‍ ലാല്‍ (23) അക്ഷയ് (23) എന്നിവരെയാണ് ജില്ലാ നര്‍കോട്ടിക് സെല്‍ സബ്ഇന്‍സ്‌പെക്ടര്‍ ജസ്റ്റിന്റെ നേതൃത്വത്തില്‍ മലപ്പുറം ഡാന്‍സഫ് ടീമും വേങ്ങര പൊലീസും ചേര്‍ന്ന് തിങ്കളാഴ്ച പുലര്‍ച്ചെ ദേശീയപാത കൂരിയാട് അടിപ്പാതയില്‍ നിന്ന് പിടികൂടിയത്. വില്‍പന നടത്തുന്നതിനായി ഉപയോഗിച്ച കാറും പിടികൂടി.