കെഎസ്‌ആര്‍ടിസി സ്വിഫ്റ്റ് ബസില്‍ തീപ്പിടിത്തം; യാത്രക്കാരെ പുറത്തിറക്കി, ആളപായമില്ല
തിരുവനന്തപുരം: ആറ്റിങ്ങലില്‍ ഓടിക്കൊണ്ടിരുന്ന കെഎസ്‌ആർടിസി സ്വിഫ്റ്റ് ബസില്‍ തീപിടിത്തം. ആറ്റിങ്ങല്‍ പ്രൈവറ്റ് ബസ് സ്റ്റാൻഡിന് സമീപത്തായിരുന്നു സംഭവം.ബസിലെ മൊബൈല്‍ സോക്കറ്റില്‍നിന്ന് തീ പടരുകയായിരുന്നുവെന്നാണ് സൂചന.
പുക ഉയരുന്നത് കണ്ട് യാത്രക്കാർ ബഹളംവെച്ചതോടെ ബസ് ദേശീയപാതയില്‍ നിർത്തുകയായിരുന്നു. തുടർന്ന് യാത്രക്കാർ പുറത്തിറങ്ങി. ബസില്‍ നിറയെ ആളുകളുണ്ടായിരുന്നു. ചില യാത്രികരുടെ ബാഗുകളിലും തീപിടിച്ചു. ആളപായമില്ല.
തിരുവനന്തപുരത്തുനിന്ന് കൊല്ലം ഭാഗത്തേക്ക് പോവുകയായിരുന്ന ബസാണ് അപകടത്തില്‍പെട്ടത്. തീപിടിത്തത്തെത്തുടർന്ന് ദേശീയപാതയില്‍ ഗതാഗത തടസം നേരിട്ടു.