ആഡംബര ഇലക്‌ട്രിക് കാറുകള്‍ക്കായി വൻതോതില്‍ കാശെറിഞ്ഞ് ഇന്ത്യക്കാര്‍, ബിഎംഡബ്ല്യു വിറ്റത് 5000 വാഹനങ്ങള്‍
ജ‍ർമ്മൻ ആഡംബര വാഹന ബ്രാൻഡായ ബിഎംഡബ്ല്യു ഗ്രൂപ്പ് ഇന്ത്യ 5,000 ഇലക്‌ട്രിക് വാഹന വിതരണ നാഴികക്കല്ല് പിന്നിടുന്ന രാജ്യത്തെ ആദ്യത്തെ ആഡംബര കാർ നിർമ്മാതാക്കളായി മാറി.ഇത് ഇന്ത്യയുടെ പ്രീമിയം ഇവി വിപണിയിലെ ഒരു സുപ്രധാന നാഴികക്കല്ലാണ്. ഈ നേട്ടം ആഘോഷിക്കുന്നതിനായി, ജമ്മു മുതല്‍ മധുര വരെ നീളുന്ന 4,000 കിലോമീറ്റർ നീളമുള്ള ഹൈ-പവർ ചാർജിംഗ് ഇടനാഴി കമ്ബനി ഉദ്ഘാടനം ചെയ്തു, പ്രധാന ദേശീയ പാതകളിലും ഡല്‍ഹി, ജയ്‍പൂർ, അഹമ്മദാബാദ്, മുംബൈ, പൂനെ, ബെംഗളൂരു, കോയമ്ബത്തൂർ, മധുര തുടങ്ങിയ പ്രധാന നഗരങ്ങളിലും ഓരോ 300 കിലോമീറ്ററിലും ചാർജിംഗ് സ്റ്റേഷനുകള്‍ ലഭിക്കുന്നു.
2025 ന്‍റെ ആദ്യ പകുതിയില്‍ മാത്രം, ബിഎംഡബ്ല്യുവും മിനിയും 1,322 ഇലക്‌ട്രിക് വാഹനങ്ങള്‍ വിറ്റു. ഇത് കഴിഞ്ഞ വർഷത്തെ അപേക്ഷിച്ച്‌ 234 ശതമാനം വർദ്ധനവാണ് കാണിക്കുന്നത്. ബിഎംഡബ്ല്യു ഗ്രൂപ്പ് ഇന്ത്യയുടെ മൊത്തം വില്‍പ്പനയുടെ 18 ശതമാനം ഇപ്പോള്‍ ഇലക്‌ട്രിക് വാഹനങ്ങളാണ്. ബിഎംഡബ്ല്യു iX1 ലോംഗ് വീല്‍ബേസ് വില്‍പ്പനയില്‍ മുന്നിലാണ്. തൊട്ടുപിന്നാലെ ഫ്ലാഗ്ഷിപ്പ് മോഡലായ ബിഎംഡബ്ല്യു i7 ഉം മികച്ച വില്‍പ്പന നേടുന്നു . ബ്രാൻഡ് ഇപ്പോള്‍ രാജ്യത്തുടനീളം 6,000-ത്തിലധികം ചാർജിംഗ് പോയിന്റുകള്‍ ഉപഭോക്താക്കള്‍ക്ക് വാഗ്‍ദാനം ചെയ്യുന്നു. മൈബിഎംഡബ്ല്യു ആപ്പ് വഴി നിങ്ങള്‍ക്ക് ഇത് എളുപ്പത്തില്‍ കണ്ടെത്താനും ആക്ടീവ് ചെയ്യാനും കഴിയും . ഇതുപയോഗിച്ച്‌, ഉപയോക്താക്കള്‍ക്ക് ചാർജറിന്റെ തത്സമയ സ്റ്റാറ്റസും കാണാൻ കഴിയും. ഇത് മാത്രമല്ല, സ്റ്റേഷനുകള്‍ ശേഷി അനുസരിച്ച്‌ ഫില്‍ട്ടർ ചെയ്യാനും കഴിയും. അതേസമയം, വ്യവസായത്തില്‍ ആദ്യമായി ബിഎംഡബ്ല്യു ചാർജിംഗ് കണ്‍സേർജ് സേവനവും അവതരിപ്പിച്ചു.
5,000 ഇലക്‌ട്രിക് വാഹന ഡെലിവറികള്‍ എന്ന നാഴികക്കല്ല് പിന്നിടുന്ന ആദ്യത്തെ ആഡംബര കാർ നിർമ്മാതാക്കളാകാൻ കഴിഞ്ഞതില്‍ ബിഎംഡബ്ല്യു ഗ്രൂപ്പ് ഇന്ത്യ അതിയായി അഭിമാനിക്കുന്നുവെന്ന് ബിഎംഡബ്ല്യു ഗ്രൂപ്പ് ഇന്ത്യ പ്രസിഡന്റും സിഇഒയുമായ വിക്രം പവ പറഞ്ഞു. സ്റ്റാറ്റിക്, സിയോണ്‍ എന്നിവയുമായി സഹകരിച്ച്‌ 120 കിലോവാട്ട് മുതല്‍ 720 കിലോവാട്ട് വരെ ശേഷിയുള്ള ചാർജിംഗ് സ്റ്റേഷനുകള്‍ ഉപഭോക്തൃ സൗകര്യാർത്ഥം കഫേകള്‍, റെസ്റ്റോറന്റുകള്‍, പൊതു സ്ഥലങ്ങള്‍ എന്നിവയ്ക്ക് സമീപം സ്ഥാപിച്ചിരിക്കുന്നു. ബിഎംഡബ്ല്യു ഉപഭോക്താക്കള്‍ക്ക് മാത്രമല്ല, ഇന്ത്യയിലെ എല്ലാ ഇലക്‌ട്രിക് വാഹന ഉടമകള്‍ക്കും ഈ ഇടനാഴിയിലേക്ക് പ്രവേശനം ലഭ്യമാണെന്നും കമ്ബനി പറയുന്നു.