75-ാം ജന്മദിനത്തില്‍ പ്രധാനമന്ത്രിക്ക് സമ്മാനം; 21ഭാഷകളില്‍ ആലപിച്ച ഗാനം തയ്യാറാക്കി ഡല്‍ഹി സര്‍ക്കാര്‍
ന്യൂഡല്‍ഹി: എഴുപത്തിയഞ്ചാം ജന്മദിനത്തിന്റെ ഭാഗമായി പ്രധാനമന്ത്രി നരേന്ദ്ര മോദിക്ക് വേണ്ടി 21 ഭാഷകളില്‍ ഗാനം തയ്യാറാക്കി ഡല്‍ഹി സർക്കാർ.സെപ്റ്റംബർ പതിനേഴിനാണ് പ്രധാന മന്ത്രിയുടെ ജന്മദിനം. സാമൂഹികമാധ്യമമായ എക്സിലാണ് രേഖ ഗുപ്ത ഗാനം പങ്കു വെച്ചത്.
‘നമോ പ്രഗതി ദില്ലി – ബാല്‍ സ്വർ സെ രാഷ്ട്ര സ്വർ തക്’ എന്ന് തുടങ്ങുന്ന ഗാനം തയ്യാറാക്കിയത് വിദ്യാഭ്യാസ വകുപ്പാണ്. ഇരുപത്തിയൊന്ന് ഭാഷകളില്‍ വിദ്യാർഥികള്‍ ഈ ഗാനം ആലപിക്കും. ‘വർഷങ്ങളായി പ്രധാനമന്ത്രി ഡല്‍ഹിക്ക് വേണ്ടി പ്രവർത്തിക്കുന്നു. ഇതൊക്കെയാണെങ്കിലും മുൻ സർക്കാരുകള്‍ അദ്ദേഹത്തെ തുടർച്ചയായി വിമർശിക്കുകയാണ് ചെയ്തത്. ഇന്ന് ഞങ്ങളുടെ സർക്കാർ അദ്ദേഹത്തോടുള്ള നന്ദി രേഖപ്പെടുത്താൻ ഈ അവസരം ഉപയോഗിക്കുകയാണ്.’ മുഖ്യമന്ത്രി മാധ്യമങ്ങളോട് പറഞ്ഞു.
പ്രധാനമന്ത്രിക്ക് ആശംസ അറിയിച്ച വിദ്യാർഥികള്‍ക്ക് നന്ദി അറിയിക്കുകയും അവരുണ്ടാക്കിയ ആശംസാ കാർഡുകള്‍ ജന്മദിനമായ ബുധനാഴ്ച ലഭിക്കുന്ന രീതിയില്‍ അദ്ദേഹത്തിന് അയക്കുമെന്നും മന്ത്രി കൂട്ടിച്ചേർത്തു. ജന്മദിനത്തിന്റെ ഭാഗമായി വിദ്യാഭ്യാസ രംഗത്ത് ‘സി.എം ശ്രീ’, ‘ രാഷ്ട്ര നീതി’, ‘നീവ് ആൻഡ് നിപുണ്‍’ തുടങ്ങിയ പദ്ധതികള്‍ ആരംഭിക്കുമെന്നും മന്ത്രി പറഞ്ഞു.