സൗദിയില്‍ ആദ്യമായി ‘ഫനാറ്റിക്‌സ് ഫ്‌ളാഗ് ഫുട്‌ബോള്‍ ക്ലാസിക്’ ആഗോള ടൂര്‍ണമെന്റ് മാര്‍ച്ചില്‍ നടക്കും
റിയാദ്: 2026 മാര്‍ച്ചില്‍ നടക്കുന്ന റിയാദ് സീസണ്‍ പരിപാടിയില്‍ ‘ഫനാറ്റിക്‌സ് ഫ്‌ളാഗ് ഫുട്ബാള്‍ ക്ലാസിക്’ എന്ന പേരില്‍ ആഗോള പരിപാടിക്ക് ആതിഥേയത്വം വഹിക്കുമെന്ന് പൊതുവിനോദ അതോറിറ്റി ഡയറക്ടര്‍ ബോര്‍ഡ് ചെയര്‍മാന്‍ അമീര്‍ തുര്‍ക്കി ബിന്‍ അബ്ദുല്‍ മുഹ്‌സിന്‍ ആലുശൈഖ് വ്യക്തമാക്കി. 2026 മാര്‍ച്ച് 21 ശനിയാഴ്ച റിയാദിലെ കിങ്ഡം അരീനയില്‍ നടക്കുന്ന ‘ഫനാറ്റിക്‌സ് ഫ്‌ലാഗ് ഫുട്‌ബോള്‍ ക്ലാസിക്’ ടൂര്‍ണമെന്റില്‍ അമേരിക്കന്‍ ഫ്‌ലാഗ് ഫുട്ബാള്‍ ഇതിഹാസം ടോം ബ്രാഡി പങ്കെടുക്കും. 2023 ല്‍ വിരമിച്ചതിനുശേഷം ടോം ബ്രാഡിയുടെ കളിക്കളത്തിലേക്കുള്ള ആദ്യ ഔദ്യോഗിക തിരിച്ചുവരവായിരിക്കും ഇത്.
ഏഴ് തവണ സൂപ്പര്‍ ബൗള്‍ കിരീടം നേടിയ ടോം ബ്രാഡിക്ക് പുറമേ, സാക്വന്‍ ബാര്‍ക്ലി, സീഡീ ലാംബ്, ക്രിസ്റ്റ്യന്‍ മക്കാഫ്രി, സോസ് ഗാര്‍ഡ്‌നര്‍, ടൈറിക് ഹില്‍, ഒഡെല്‍ ബെക്കാം ജൂനിയര്‍, സഹതാരം റോബ് ഗ്രോണ്‍കോവ്‌സ്‌കി തുടങ്ങിയ പ്രമുഖ താരങ്ങളും മത്സരത്തില്‍ അണിനിരക്കും. എന്‍.എഫ്.എല്‍ താരങ്ങളെയും മറ്റ് കായിക, വിനോദ മേഖലകളിലെ പ്രമുഖരെയും ഒരുമിപ്പിച്ച് ഒരുക്കുന്ന ഈ ടൂര്‍ണമെന്റ് കായിക ലോകത്തെ ഒരു പുതിയ അനുഭവമായിരിക്കും. ‘ഫനാറ്റിക്‌സ് ഫ്‌ളാഗ് ഫുട്ബാള്‍ ക്ലാസിക്’ സൗദിയില്‍ ഇത്തരത്തിലുള്ള ആദ്യത്തെ ടൂര്‍ണമെന്റാണ്. ഒ.ബി.ബി മീഡിയയും ഫനാറ്റിക്‌സും ചേര്‍ന്ന് ഒരുക്കുന്ന റൗണ്ട്-റോബിന്‍ ടൂര്‍ണമെന്റില്‍ എട്ട് കളിക്കാര്‍ വീതമുള്ള മൂന്ന് ടീമുകള്‍ മത്സരിക്കും.
ഇതില്‍ പീറ്റ് കരോള്‍, സീന്‍ പേറ്റണ്‍, കൈല്‍ ഷാനഹാന്‍ എന്നിവരാണ് ടീമുകളുടെ പരിശീലകര്‍. ആദ്യ രണ്ട് സ്ഥാനങ്ങളിലെത്തുന്ന ടീമുകള്‍ ചാമ്പ്യന്‍ഷിപ്പ് ഫൈനലില്‍ ഏറ്റുമുട്ടും. ലോകത്തെ പ്രമുഖ സ്പോര്‍ട്സ് നെറ്റ്വര്‍ക്കുകളിലൊന്നായ ഫോക്സ് സ്പോര്‍ട്സിലും ഡിജിറ്റല്‍ സ്ട്രീമിങ് പ്ലാറ്റ്ഫോമായ ട്യൂബിയിലും ഈ ആഗോള പരിപാടി തത്സമയം സംപ്രേഷണം ചെയ്യും. ഇത് അമേരിക്കയിലും വിദേശത്തും വിശാലമായ പ്രേക്ഷകരിലേക്ക് എത്തുന്നുവെന്ന് ഉറപ്പാക്കുന്നു. പ്രശസ്ത അന്താരാഷ്ട്ര ഹാസ്യനടന്‍ കെവിന്‍ ഹാര്‍ട്ട് ആയിരിക്കും അവതാരകന്‍.
ലോസ് ഏഞ്ചല്‍സില്‍ നടക്കുന്ന 2028 ലെ സമ്മര്‍ ഒളിമ്പിക്‌സില്‍ ഫ്‌ലാഗ് ഫുട്ബാള്‍ അരങ്ങേറ്റം കുറിക്കാനിരിക്കെ, ഈ ടൂര്‍ണമെന്റ് കായിക വിനോദത്തിന്റെ പ്രാധാന്യം വര്‍ധിപ്പിക്കും. നിലവില്‍ ലോകമെമ്പാടും 20 ദശലക്ഷത്തിലധികം കളിക്കാര്‍ ഫ്‌ലാഗ് ഫുട്ബാള്‍ കളിക്കുന്നുണ്ട്. റിയാദ് സീസണ്‍ ലോകോത്തര നിലവാരമുള്ള പരിപാടികള്‍ സംഘടിപ്പിക്കുന്നതിനുള്ള തങ്ങളുടെ ദൗത്യം തുടരുകയാണെന്ന് സൗദിയിലെ ജനറല്‍ എന്റര്‍ടൈന്‍മെന്റ് അതോറിറ്റി ചെയര്‍മാന്‍ തുര്‍ക്കി അല്‍ ആലുശൈഖ് പറഞ്ഞു.
ഫ്‌ളാഗ് ഫുട്ബാളിന്റെ വളര്‍ച്ചയെ പിന്തുണയ്ക്കുന്നതില്‍ സന്തോഷമുണ്ടെന്നും ഈ കളി ലോകമെമ്പാടുമുള്ള പ്രേക്ഷകരിലേക്ക് എത്തിക്കാന്‍ റിയാദ് സീസണ്‍ സഹായിക്കുമെന്നും അദ്ദേഹം കൂട്ടിച്ചേര്‍ത്തു. കളിക്കളത്തിലേക്ക് മടങ്ങിയെത്തുന്നതില്‍ താന്‍ ആവേശഭരിതനാണെന്ന് ടോം ബ്രാഡി പറഞ്ഞു. മത്സരബുദ്ധി വീണ്ടും ഉണര്‍ത്താനും ആഗോള തലത്തില്‍ ഫ്‌ളാഗ് ഫുട്‌ബോളിനെ അവതരിപ്പിക്കാനും സാധിക്കുന്നതില്‍ അതിയായ സന്തോഷമുണ്ട്. ഈ കളി റിയാദിലെ ആരാധകരിലേക്ക് എത്തിക്കാന്‍ കഴിയുന്നത് വലിയ കാര്യമാണെന്നും അദ്ദേഹം പറഞ്ഞു.