സിവിൽ ഏവിയേഷൻ രംഗത്തെ നേട്ടം, കുവൈത്തിന് അന്താരാഷ്ട്ര അംഗീകാരം

കുവൈത്ത് സിറ്റി: സിവിൽ ഏവിയേഷൻ രംഗത്തെ നേട്ടങ്ങൾക്ക് അന്താരാഷ്ട്ര സിവിൽ ഏവിയേഷൻ ഓർഗനൈസേഷൻ (ICAO) കുവൈത്തിനെ ആദരിച്ചു. ഫലപ്രദമായ സിവിൽ ഏവിയേഷൻ സുരക്ഷാ മേൽനോട്ട സംവിധാനം സ്ഥാപിക്കുകയും ഐസിഎഒ-യുടെ അന്താരാഷ്ട്ര മാനദണ്ഡങ്ങൾ മെച്ചപ്പെടുത്തുകയും ചെയ്തതിനാണ് കുവൈത്തിന് അംഗീകാരം ലഭിച്ചത്. കാനഡയിലെ മോൺട്രിയലിൽ സെപ്റ്റംബർ 23 മുതൽ ഒക്ടോബർ 3 വരെ നടക്കുന്ന ICAO-യുടെ 42-ാമത് പൊതുസഭയിലാണ് ഈ അംഗീകാരം ലഭിച്ചത്. 193 രാജ്യങ്ങളും 69 അന്താരാഷ്ട്ര, പ്രാദേശിക സംഘടനകളും ഈ പരിപാടിയിൽ പങ്കെടുക്കുന്നുണ്ട്.

സിവിൽ ഏവിയേഷൻ അതോറിറ്റി പ്രസിഡന്‍റെ ശൈഖ് എഞ്ചിനീയർ ഹമൂദ് മുബാറക് അൽ-ഹമൂദ് അൽ-സബാഹിന്റെ നേതൃത്വത്തിലുള്ള പ്രതിനിധി സംഘമാണ് കുവൈത്തിനെ പ്രതിനിധീകരിക്കുന്നത്. ഈ നേട്ടത്തിൽ അമീർ ശൈഖ് മിഷാൽ അൽ അഹ്മദ്, കിരീടാവകാശി ശൈഖ് സബാഹ് അൽ-ഖാലിദ് അൽ-ഹമദ് അൽ-സബാഹ്, പ്രധാനമന്ത്രി ശൈഖ് അഹമ്മദ് അൽ-അബ്ദുല്ല അൽ-സബാഹ്, കുവൈത്ത് സർക്കാരിനും ജനങ്ങൾക്കും, സിവിൽ ഏവിയേഷൻ ജീവനക്കാർക്കും ശൈഖ് ഹമൂദ് അൽ സബാഹ് അഭിനന്ദനങ്ങൾ അറിയിച്ചു.