കല്യാണം കഴിച്ചതുകൊണ്ടാണ് ഈ സമ്പാദ്യമൊക്കെ ഉണ്ടായതെന്ന് മിഥുന്‍, ചിരി പടര്‍ത്തി ലക്ഷ്മിയും; വീഡിയോ വൈറല്‍
സോഷ്യല്‍ മീഡിയയിലെ പ്രിയ താര ദമ്പതികളാണ് മിഥുന്‍ രമേശും ലക്ഷ്മി മേനോനും. ഇവര്‍ ഒരുമിച്ചുള്ള വീഡിയോകള്‍ പലപ്പോഴും ശ്രദ്ധനേടാറുണ്ട്. ഭാര്യയും ഭര്‍ത്താവും തമ്മിലുണ്ടാകുന്ന രസകരമായ നിമിഷങ്ങളാണ് ഇവര്‍ മിക്കപ്പോഴും കണ്ടന്റ് ആക്കാറുള്ളത്. ഇവരുടെ മകള്‍ തന്‍വിയും ഇടയ്ക്ക് വീഡിയോയില്‍ പ്രത്യക്ഷപ്പെടാറുണ്ട്. ടെലിവിഷന്‍ ഷോ അവതാരകനായാണ് മിഥുന്‍ കൂടുതല്‍ ജനപ്രീതി നേടുന്നത്. ദുബായില്‍ റേഡിയോ ജോക്കിയായ മിഥുന്‍ നിരവധി സിനിമകളിലും അഭിനയിച്ചിട്ടുണ്ട്. സോഷ്യല്‍ മീഡിയയിലാകട്ടെ, മിഥുനേക്കാള്‍ സജീവമാണ് ലക്ഷ്മി.
ഇപ്പോഴിതാ രസകരമായൊരു വീഡിയോയുമായി വീണ്ടും ഒന്നിച്ചെത്തിയിരിക്കുകയാണ് മിഥുനും ലക്ഷ്മിയും. മിഥുന്റെ ഷൂസിന്റെയും വാച്ചിന്റെയും കളക്ഷനെ കുറിച്ച് ഒരു ഒരാള്‍ ചെയ്ത കമന്റും അതിനു മിഥുന്‍ നല്‍കിയ മറുപടിയുമായാണ് വീഡിയോ തുടങ്ങുന്നത്. ഇതൊരു സീരിയസ് വീഡിയോ ആണെന്ന് തോന്നുമെങ്കിലും പിന്നീട് ചിരി പടര്‍ത്തിക്കൊണ്ടാണ് ലക്ഷ്മിയുടെ രംഗപ്രവേശം.
”മിഥുന്‍ ബ്രോയുടെ ഷൂസിന്റെയും വാച്ചിന്റെയും കലക്ഷന്‍ കല്യാണം കഴിച്ചില്ലായിരുന്നെങ്കില്‍ ഒന്നുകൂടി കൂടിയേനെ. ലക്ഷ്മി കൂടെ ഇല്ലായിരുന്നെങ്കില്‍ ഫുള്‍ പൈസ മുടക്കി വാച്ചും ഷൂസും വാങ്ങിയേനെ”, എന്നായിരുന്നു കമന്റ്. എന്നാല്‍ തനിക്കീ സമ്പാദ്യമൊക്കെ ഉണ്ടായത് കല്യാണം കഴിച്ചതിനു ശേഷമാണ് എന്നായിരുന്നു മിഥുന്റെ മറുപടി.
”കല്യാണം കഴിഞ്ഞില്ലായിരുന്നെങ്കില്‍ ഈ ഉയര്‍ച്ചയൊന്നും ഉണ്ടാകില്ലായിരുന്നു. കാര്യമായ സേവിങ്‌സ് ഒന്നും ഉണ്ടാകാതെ പോയേനെ. കല്യാണം കഴിഞ്ഞില്ലായിരുന്നെങ്കില്‍ കൂടുതല്‍ സാധനങ്ങള്‍ വാങ്ങുമായിരുന്നോ എന്ന ചോദ്യം തന്നെ അപ്രസക്തമാണ്. കല്യാണം കഴിഞ്ഞില്ലായിരുന്നെങ്കില്‍ ഇത്രയും സാധനങ്ങള്‍ വാങ്ങാനുള്ള സമ്പാദ്യം എന്റെ കയ്യില്‍ ഉണ്ടാകുമായിരുന്നില്ല”, എന്നാണ് മിഥുന്‍ പറഞ്ഞത്. ഇതിനിടെയായിരുന്നു ലക്ഷ്മിയുടെ വരവ്. ഞാനാണ് നിങ്ങളുടെ ഭാഗ്യമെന്ന് പറയാന്‍ പറഞ്ഞു പഠിപ്പിച്ചിട്ട് എന്തേ പറയാത്തത് എന്നായിരുന്നു ലക്ഷ്മിയുടെ ചോദ്യം.