നിലമ്പൂരില്‍ പനി ബാധിച്ച് ചികിത്സയിലായിരുന്ന ആദിവാസി യുവതി മരിച്ചു
നിലമ്പൂരില്‍ പനി ബാധിച്ച് ചികിത്സയിലായിരുന്ന ആദിവാസി യുവതി മരിച്ചു. ചോലനായ്ക്കര്‍ വിഭാഗത്തിലെ കരുളായി ഉള്‍വനത്തിലെ സുസ്മിതയാണ് (20) മരിച്ചത്. മൂന്ന് ആഴ്ച മുമ്പാണ് സുസ്മിതയ്ക്ക് പനി തുടങ്ങിയത്. എന്നാല്‍ വാഹനങ്ങളുടെ ലഭ്യത കുറവായതിനാല്‍ ആശുപത്രിയില്‍ പോകാന്‍ ഇവര്‍ക്ക് സാധിച്ചിരുന്നില്ല. പിന്നീട് ട്രൈബല്‍ എക്സ്റ്റന്‍ഷന്‍ ഓഫിസര്‍ ഇടപെട്ടാണ് ഇവരെ ആശുപത്രിയില്‍ എത്തിക്കുന്നത്. കരുളായിയില്‍ നിന്ന് 25 കിലോമീറ്റര്‍ അകലെ കുപ്പമലയില്‍ പാറ അളയിലാണ് കുടുംബം താമസിക്കുന്നത്. ഈ ഭാഗത്തേക്ക് വാഹനം എത്തിപ്പെടാനുള്ള സൗകര്യം കുറവായതിനാല്‍ കുട്ടയില്‍ ചുമന്നാണ് യുവതിയെ ബന്ധുക്കള്‍ ജീപ്പ് വന്നിരുന്ന സ്ഥലത്തേക്ക് എത്തിച്ചിരുന്നത്.
കഴിഞ്ഞ വെള്ളിയാഴ്ചയാണ് ജില്ലാ ആശുപത്രിയില്‍ സുസ്മിതയെ പ്രവേശിപ്പിച്ചത്. ഇന്നലെ രക്തസമ്മര്‍ദ്ദവും ശരീരത്തില്‍ ഓക്‌സിജന്റ അളവും കുറഞ്ഞതോടെയാണ് ആരോഗ്യനില മോശമായത്.തുടര്‍ന്ന് തീവ്ര പരിചരണവിഭാഗത്തിലേക്ക് ഇവരെ മാറ്റിയെങ്കിലും ജീവന്‍ രക്ഷിക്കാനായില്ല.