എല്‍ഡിഎഫും യുഡിഎഫും എന്‍ഡിഎയും വഞ്ചിച്ചു, തദ്ദേശ തെരഞ്ഞെടുപ്പില്‍ വീണ്ടും ചര്‍ച്ചയായി മുനമ്പം, സമവാക്യങ്ങള്‍ മാറുമെന്ന് സമരസമിതി
കൊച്ചി: തെരഞ്ഞെടുപ്പ് മുനമ്പം ഭൂമി തര്‍ക്കം സജീവ ചര്‍ച്ചയാക്കാന്‍ സമരസമിതി. ഒരു പഞ്ചായത്തിലോ ജില്ലയിലോ മാത്രമല്ല സംസ്ഥാനമൊട്ടാകെ തെരഞ്ഞെടുപ്പിനെ സ്വാധീനിക്കുന്നതാണ് മുനമ്പത്തെ വഖഫ് ഭൂമി തര്‍ക്കം. സുവര്‍ണ അവസരം തേടിയെത്തിയ രാഷ്ട്രീയപാര്‍ട്ടികള്‍ സമരവേദി ഒഴിഞ്ഞെങ്കിലും ക്രൈസ്തവ സഭകളുടെ പിന്തുണയില്‍ 615 കുടുംബങ്ങള്‍ 390ആം ദിവസവും നിരാഹാര സമരം തുടരുകയാണ്. വാഗ്ദാനങ്ങള്‍ പാലിക്കാത്ത രാഷ്ട്രീയ കക്ഷികളുടെ ഇരട്ടത്താപ്പിന് വോട്ടിലൂടെ മറുപടി പറയാനാണ് മുനമ്പത്തുകാരുടെ തീരുമാനം.
സംസ്ഥാന വഖഫ് ബോര്‍ഡ് ഭൂമിയില്‍ അവകാശം ഉന്നയിച്ചിട്ടില്ല എങ്കില്‍ ടൂറിസവും അടിസ്ഥാനസൗകര്യ വികസനവുമായേനെ പള്ളിപ്പുറം പഞ്ചായത്തിലെ മുനമ്പത്തുകാരുടെ തദ്ദേശ തെരഞ്ഞെടുപ്പ് അജണ്ട. എന്നാല്‍ മുനമ്പത്തെ 615കുടുംബങ്ങളുടെ സമരപോരാട്ടം ഇന്ന് സംസ്ഥാനമൊട്ടാകെ രാഷ്ട്രീയ അജണ്ട നിശ്ചയിക്കുന്ന ചര്‍ച്ചവിഷയമായി. സുവര്‍ണ അവസരം തേടിയെത്തിയ വിവിധ രാഷ്ട്രീയകക്ഷികള്‍ പറഞ്ഞതെല്ലാം വിശ്വസിച്ച് കാത്തിരുന്നിട്ട് 390ദിവസമായി. കടുത്ത നിരാശ മാത്രം തുടരുന്നുവെന്ന് സമരക്കാര്‍ പറയുന്നു. പറഞ്ഞ് വഞ്ചിച്ചവര്‍ക്ക് തദ്ദേശതെരഞ്ഞെടുപ്പില്‍ മറുപടി നല്‍കുമെന്ന് മുനമ്പത്തുകാര്‍ പറയുന്നു.
വഖഫ് ഭേദഗതി ബില്‍ പാസായാല്‍ എല്ലാത്തിനും പരിഹാരമാകുമെന്ന് പറഞ്ഞ എന്‍ഡിഎ, പത്ത് മിനിറ്റില്‍ പ്രശ്‌നപരിഹാരം സാധ്യമെന്ന് പറഞ്ഞ യുഡിഎഫ്, നിയമവഴിയില്‍ ഒപ്പം നിന്ന് അവകാശതര്‍ക്കം പരിഹരിക്കുമെന്ന് പറഞ്ഞ സംസ്ഥാന സര്‍ക്കാര്‍ തുടങ്ങി എല്ലാവരും വഞ്ചിച്ചെന്നാണ് സമരസമിതിയുടെ വിലയിരുത്തല്‍. മുനമ്പത്തേത് വഖഫ് ഭൂമിയല്ലെന്ന് ഹൈക്കോടതി പരാമര്‍ശിച്ചിട്ടും നീളുന്ന നിയമനടപടികളാണെന്നും എല്ലാവരുടെയും വാക്ക് വിശ്വസിച്ചുവെന്നും ഇവര്‍ പറയുന്നു. എല്ലാ നേതാക്കന്മാരെയും സമരപന്തലിലേക്ക് സ്വാഗതം ചെയ്തു. എന്നാല്‍ ആ വാക്കുകളിലെയും പ്രവര്‍ത്തിയിലെയും ആത്മാര്‍ത്ഥതയില്‍ സംശയമാണ് ഇന്ന് മുനമ്പത്തുകാര്‍ക്ക്.
പള്ളിപ്പുറം പഞ്ചായത്ത് ഭരിക്കുന്നത് എല്‍ഡിഎഫാണ്. വഖഫ് ഭൂമി തര്‍ക്കമുള്ള വാര്‍ഡുകളിലാകട്ടെ യുഡിഎഫ് വിജയിച്ചു. എന്നാല്‍ പരിഹാരം വൈകിയാല്‍ ഇവിടെ മാത്രമല്ല പല രാഷ്ട്രീയ സമവാക്യങ്ങളും മാറിമറിഞ്ഞേക്കുമെന്ന സൂചന നല്‍കുകയാണ് മുനമ്പത്തെ സമര സമിതി. എല്ലാ ക്രൈസ്ത സഭകളുടെയും ശക്തമായ പിന്തുണയുള്ള സമരത്തെ കരുതലോടെയാണ് വിവിധ കക്ഷികള്‍ ഉറ്റ് നോക്കുന്നത്. നിയമകുരുക്കില്‍ പ്രതിസന്ധി തുടരുന്ന വഖഫ് ഭൂമി പ്രശ്‌നം തെരഞ്ഞെടുപ്പ് വിഷയമാക്കാന്‍ രാഷ്ട്രീയ പാര്‍ട്ടികള്‍ ആഗ്രഹിക്കുന്നില്ല. എന്നാല്‍ തിരിച്ചടി ഒഴിവാക്കാന്‍ കരുതലോടെ ചെയ്ത കാര്യങ്ങള്‍ ബോധ്യപ്പെടുത്താനാണ് ശ്രമം.