മലപ്പുറം പൊന്നാനിയില്‍ അപ്രതീക്ഷിത കടലാക്രമണം, 7 വള്ളങ്ങള്‍ തകര്‍ന്നു
മലപ്പുറം പൊന്നാനിയില്‍ അപ്രതീക്ഷിത കടലാക്രമണം. 7 വള്ളങ്ങള്‍ തകര്‍ന്നു. പൊന്നാനി പാലപ്പെട്ടി അജ്‌മേര്‍ നഗറില്‍ ഇന്ന് പുലര്‍ച്ചെയുണ്ടായ കടലാക്രമണത്തിലാണ് വള്ളങ്ങള്‍ തകര്‍ന്നത്. മത്സ്യബന്ധനം കഴിഞ്ഞ് തീരത്ത് കയറ്റിയിട്ടിരുന്ന ഫൈബര്‍ വള്ളങ്ങളാണ് അപ്രതീക്ഷിതമായുണ്ടായ കടലാക്രമണത്തില്‍ തകര്‍ന്ന് കടലില്‍ പോയത്. പുലര്‍ച്ചെ 3 മണിക്ക് അപ്രതീക്ഷിതമായി കടല്‍ കരയിലേക്ക് കയറുകയായിരുന്നു.
വള്ളങ്ങളില്‍ ഉണ്ടായിരുന്ന യമഹ എന്‍ജിനുകളും വലകളും തകര്‍ന്നു. ഒരു വള്ളത്തിന് 2 ലക്ഷം രൂപയുടെ നഷ്ടമാണ് ഉണ്ടായതെന്നും ആകെ 15 ലക്ഷം രൂപയുടെ നഷ്ടം സംഭവിച്ചുവെന്നും മത്സ്യത്തൊഴിലാളികള്‍ പറയുന്നു. കാണാതായ വള്ളങ്ങള്‍ക്കായി കടലില്‍ തിരച്ചില്‍ തുടരുകയാണ്.