ജപ്പാന്‍ തീരത്ത് ഭൂചലനം; സുനാമി മുന്നറിയിപ്പ്
ടോക്യോ: ജപ്പാനിലെ വടക്കന്‍ തീരത്ത് ഭൂചലനം. റിക്ടര്‍ സ്‌കെയില്‍ 6.7 തീവ്രത രേഖപ്പെടുത്തിയ ഭൂചലനമാണുണ്ടായത്. ഞായറാഴ്ച വൈകീട്ടോടെ സമുദ്രനിരപ്പില്‍നിന്നും 10 കിലോ മീറ്റര്‍ ആഴത്തിലാണ് ഭൂചലനത്തിന്റെ പ്രഭവകേന്ദ്രം. ഭൂചലനത്തെ തുടര്‍ന്ന് ഒരു മീറ്റര്‍വരെ ഉയരത്തിലുള്ള തിരമാലകള്‍ക്ക് സാധ്യതയുള്ളതായി ജാപ്പനീസ് ഭൂകമ്പ നിരീക്ഷണ കേന്ദ്രം വ്യക്തമാക്കി.
മേഖലയില്‍ സുനാമി മുന്നറിയിപ്പ് നല്‍കിയിട്ടുണ്ട്. ഭൂചലനത്തിന് പിന്നാലെ തുടര്‍ ചലനങ്ങളും ഉണ്ടായതായി റിപ്പോര്‍ട്ടുകളുണ്ട്. സുനാമി മുന്നറിയിപ്പുള്ളതിനാല്‍ തീരപ്രദേശങ്ങളില്‍ നിന്ന് ആളുകള്‍ മാറിനില്‍ക്കണമെന്നും തുടര്‍ ചലനങ്ങള്‍ക്ക് ഇനിയും സാധ്യതയുള്ളതായും അധികൃതര്‍ വ്യക്തമാക്കി.