ആദ്യ എവിക്ഷനില്‍ ഞെട്ടിച്ച് ഫിനാലെ! ആ മത്സരാര്‍ഥി പുറത്ത്; ടൈറ്റില്‍ വിജയി ഈ 4 പേരില്‍ നിന്ന്
ഒട്ടേറെ സര്‍പ്രൈസുകള്‍ മത്സരാര്‍ഥികള്‍ക്കും പ്രേക്ഷകര്‍ക്കുമായി ഒരുക്കിയ ഒരു ബിഗ് ബോസ് സീസണിനാണ് ഇന്ന് തിരശ്ശീല വീഴുന്നത്. ഗ്രാന്‍ഡ് ഫിനാലെ ദിനത്തിലും അത്തരം ഷോക്കുകള്‍ക്കും സര്‍പ്രൈസുകള്‍ക്കും അവസാനമില്ല. ഫൈനല്‍ ഫൈവ് മത്സരാര്‍ഥികളിലെ ആദ്യ എവിക്ഷനും പ്രേക്ഷകരെയും സഹമത്സരാര്‍ഥികളെയും സംബന്ധിച്ച് അത്തരത്തില്‍ സര്‍പ്രൈസ് നല്‍കിയ ഒന്നായിരുന്നു. അനുമോള്‍, അനീഷ്, നെവിന്‍, അക്ബര്‍, ഷാനവാസ് എന്നിവര്‍ അടങ്ങിയതായിരുന്നു ഇത്തവണത്തെ ഫൈനല്‍ 5. ഫൈനല്‍ 6 ല്‍ നിന്ന് ഇന്നലെ നൂറ പുറത്തായതോടെയാണ് ഈ സീസണിലെ ഫൈനല്‍ 5 തീരുമാനിക്കപ്പെട്ടത്.
ഈ സീസണിലെ ഏറ്റവും വേറിട്ട എവിക്ഷനാണ് ?ഗ്രാന്‍ഡ് ഫിനാലെ ദിനത്തില്‍ ബി?ഗ് ബോസ് നടത്തിയത്. ആദ്യം പണിപ്പുരയിലേക്ക് അഞ്ച് പേരും പോകേണ്ടിയിരുന്നു. 20 സെക്കന്‍ഡ് സമയത്തിനുള്ളില്‍ അവിടെയുള്ള സാധനങ്ങള്‍ എടുത്തുകൊണ്ട് വരേണ്ടിയിരുന്നു. മോഹന്‍ലാലിന്റെ ആശംസാ സന്ദേശങ്ങള്‍ ആയിരുന്നു അത്. എന്നാല്‍ ഷാനവാസിന് മാത്രം അത് ലഭിച്ചിരുന്നില്ല. എന്നാല്‍ ആക്റ്റിവിറ്റി റൂമില്‍ ആയിരുന്നു യഥാര്‍ഥ എവിക്ഷന്‍. ഇതിനായി നമ്പരുകള്‍ എഴുതിയ ഒരു കളിക്കളത്തില്‍ കരുക്കളായി മത്സരാര്‍ഥികള്‍ തന്നെ നില്‍ക്കുകയായിരുന്നു വേണ്ടിയിരുന്നത്. മുന്നിലുള്ള കാര്‍ഡുകളില്‍ എഴുതിയതനുസരിച്ച് അവര്‍ നീങ്ങേണ്ടിയിരുന്നു. ഇങ്ങനെ പ്രവര്‍ത്തിച്ച് ആദ്യം സേവ്ഡ് ആയത് അനുമോള്‍ ആയിരുന്നു. പിന്നാലെ നെവിനും. ഒടുവില്‍ ഷാനവാസും അനീഷും ഒരുമിച്ച് സേവ്ഡ് ആയി. അങ്ങനെ ഫൈനല്‍ ഫൈവിലെ ആദ്യ എവിക്ഷനായി അക്ബര്‍ പുറത്തായി. പ്രേക്ഷകരെ ഞെട്ടിച്ച ഒരു പുറത്താവല്‍ കൂടിയായിരുന്നു ഇത്.
ഈ സീസണിലെ ശ്രദ്ധേയ മത്സരാര്‍ഥികളില്‍ ഒരാളായിരുന്നു അക്ബര്‍ ഖാന്‍. ഒരു ഗായകന്‍ എന്ന നിലയില്‍ ടെലിവിഷന്‍ പ്രേക്ഷകര്‍ക്കും സുപരിചിതനായ അക്ബര്‍ സീസണ്‍ 7 ല്‍ എത്തിയ പോപ്പുലര്‍ മത്സരാര്‍ഥികളില്‍ ഒരാള്‍ കൂടി ആയിരുന്നു. എന്നാല്‍ ഗായകന്‍ എന്ന നിലയില്‍ പ്രതിഭ തെളിയിച്ച ആളാണെങ്കിലും വെല്ലുവിളികള്‍ നിറഞ്ഞ ബിഗ് ബോസ് ഹൗസില്‍ അയാള്‍ എത്തരത്തില്‍ മുന്നേറുമെന്ന് അറിയാന്‍ പ്രേക്ഷകര്‍ക്ക് താല്‍പര്യം ഉണ്ടായിരുന്നു. ഒരുപക്ഷേ ആ പ്രതീക്ഷകള്‍ക്ക് ഒപ്പം അല്ലെങ്കില്‍ അതിന് മുകളില്‍ സ്‌കോര്‍ ചെയ്യാന്‍ ഒരു ബിഗ് ബോസ് മത്സരാര്‍ഥി എന്ന നിലയില്‍ അക്ബറിന് സാധിച്ചു.
