എല്ലാ സ്‌കൂളുകളിലും വന്ദേമാതരം ആലപിക്കുന്നത് നിര്‍ബന്ധമാക്കുമെന്ന് പ്രഖ്യാപിച്ച് യുപി മുഖ്യമന്ത്രി; അഭിമാനബോധം വളര്‍ത്തുന്നതിനെന്ന് യോഗി ആദിത്യനാഥ്
ലഖ്‌നൗ: സംസ്ഥാനത്തെ എല്ലാ സ്‌കൂളുകളിലും വിദ്യാഭ്യാസ സ്ഥാപനങ്ങളിലും വന്ദേമാതരം ആലപിക്കുന്നത് നിര്‍ബന്ധമാക്കുമെന്ന് ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ് പ്രഖ്യാപിച്ചു. ഗോരഖ്പൂരില്‍ നടന്ന ‘ഏകതാ യാത്ര’യിലും വന്ദേമാതരം കൂട്ടത്തോടെ ആലപിക്കുന്ന പരിപാടിയിലും സംസാരിക്കുമ്പോള്‍ രാജ്യത്തോടുള്ള ബഹുമാനവും അഭിമാനബോധവും വളര്‍ത്തുന്നതിനാണ് ഈ നീക്കമെന്നും മുഖ്യമന്ത്രി വ്യക്തമാക്കി. ‘ദേശീയ ഗീതമായ വന്ദേമാതരത്തോട് ആദരവ് ഉണ്ടാകണം. ഉത്തര്‍പ്രദേശിലെ എല്ലാ സ്‌കൂളുകളിലും വിദ്യാഭ്യാസ സ്ഥാപനങ്ങളിലും ഞങ്ങള്‍ ഇത് നിര്‍ബന്ധമാക്കും,’ യോഗി ആദിത്യനാഥ് സദസ്സിനെ അഭിസംബോധന ചെയ്തുകൊണ്ട് പറഞ്ഞു.
ജിന്നയെ പരാമര്‍ശിച്ചുള്ള വിമര്‍ശനം
കൂടാതെ, ദേശീയ ഗീതത്തെ എതിര്‍ക്കുന്നവരെ വിമര്‍ശിക്കാന്‍ ആദിത്യനാഥ് അഖിലേന്ത്യാ മുസ്ലീം ലീഗ് നേതാക്കളായ മുഹമ്മദ് അലി ജിന്നയുടെയും മുഹമ്മദ് അലി ജൗഹറിന്റെയും പേരുകള്‍ പരാമര്‍ശിച്ചു. ഇത്തരം എതിര്‍പ്പുകള്‍ ഇന്ത്യയുടെ ഐക്യത്തെ ദുര്‍ബലപ്പെടുത്തുന്നു എന്ന് അദ്ദേഹം പറഞ്ഞു. ‘ഒരു സമാജ്വാദി പാര്‍ട്ടി എംപി വീണ്ടും ദേശീയ ഗീതത്തിനെതിരെ പ്രതിഷേധിച്ചു. ഇന്ത്യയുടെ അഖണ്ഡതയുടെ ശില്‍പിയായ സര്‍ദാര്‍ വല്ലഭായ് പട്ടേലിന്റെ ജന്മവാര്‍ഷികത്തില്‍ നിന്ന് വിട്ടുനില്‍ക്കുന്ന ഇതേ ആളുകളാണ് ജിന്നയെ ആദരിക്കുന്ന പരിപാടികളില്‍ ലജ്ജയില്ലാതെ പങ്കെടുക്കുന്നത്’ ആദിത്യനാഥ് പറഞ്ഞു.
ഇന്ത്യയില്‍ ഒരു പുതിയ ജിന്നയും ഇനി ഉയര്‍ന്നു വരുന്നില്ലെന്ന് ഉറപ്പാക്കാന്‍ മുഖ്യമന്ത്രി ജനങ്ങളോട് അഭ്യര്‍ത്ഥിച്ചു. രാജ്യത്തിന്റെ അഖണ്ഡതയെ ആരെങ്കിലും ചോദ്യം ചെയ്യാന്‍ ധൈര്യപ്പെട്ടാല്‍, അത്തരം വിഭജന ലക്ഷ്യങ്ങളെ അത് വേരൂന്നുന്നതിന് മുമ്പ് തന്നെ ഇല്ലാതാക്കണമെന്നും യുപി മുഖ്യമന്ത്രി പറഞ്ഞു. ‘1896 മുതല്‍ 1922 വരെ എല്ലാ കോണ്‍ഗ്രസ് സെഷനുകളിലും വന്ദേമാതരം ആലപിച്ചിരുന്നു, എന്നാല്‍ 1923-ല്‍ ജൗഹര്‍ കോണ്‍ഗ്രസ് പ്രസിഡന്റായപ്പോള്‍, ഗീതം തുടങ്ങിയ ഉടന്‍ അദ്ദേഹം ഇറങ്ങിപ്പോവുകയും പങ്കെടുക്കാന്‍ വിസമ്മതിക്കുകയും ചെയ്തു. സഹോദരീ സഹോദരന്മാരെ, വന്ദേമാതരത്തോടുള്ള ആ എതിര്‍പ്പ് ഇന്ത്യയുടെ വിഭജനത്തിന് നിര്‍ഭാഗ്യകരമായ കാരണങ്ങളിലൊന്നായി മാറി,’ അദ്ദേഹം കൂട്ടിച്ചേര്‍ത്തു.
