യുഡിഎഫ് പൊന്നാനിയില്‍ സ്ഥാനാര്‍ത്ഥി പ്രഖ്യാപന കണ്‍വെന്‍ഷന്‍ നടത്തി
പൊന്നാനി: പൊന്നാനി നഗരസഭയില്‍ ഐക്യ ജനാധിപത്യമുന്നണി സ്ഥാനാര്‍ത്ഥി പ്രഖ്യാപനവും തിരഞ്ഞെടുപ്പ് കണ്‍വെന്‍ഷനും എംപി അബ്ദുല്‍ സമദ് സമദാനി എംപി ഉദ്ഘാടനം ചെയ്തു. ബീഹാറില്‍ ഇന്ത്യ മുന്നണിയുടെ പരാജയം ആഘോഷിക്കുകയും, രാഹുല്‍ഗാന്ധിയെ പരിഹസിക്കുകയും ചെയ്യുന്ന സിപിഎം നേതൃത്വം ബിജെപിയെ കേരളത്തില്‍ വളര്‍ത്തിയെടുക്കുന്നതില്‍ നിര്‍ണായക പങ്കാണ് വഹിക്കുന്നതെന്ന് കണ്‍വെന്‍ഷന്‍ ഉദ്ഘാടനം ചെയ്തുകൊണ്ട് സമദാനി കുറ്റപ്പെടുത്തി. ബീഹാര്‍ തിരഞ്ഞെടുപ്പുമായി ബന്ധപ്പെട്ട് ഇന്ത്യ മുന്നണിയിലെ എല്ലാ ഘടകകക്ഷികളും കേന്ദ്ര തെരഞ്ഞെടുപ്പ് കമ്മീഷന്റെ ബിജെപി അനുകൂല നിലപാടിനെ പരസ്യമായി തള്ളിപ്പറയുമ്പോഴും മൗനം പാലിക്കുന്ന സിപിഎം നേതൃത്വത്തിന്റെ തീരുമാനം ബിജെപിയെ സഹായിക്കുന്നതാണെന്നും, തദ്ദേശ, നിയമസഭാ തിരഞ്ഞെടുപ്പുകളില്‍ ജനങ്ങള്‍ സിപിഎമ്മിന്റെ അവസരവാദ നിലപാടിനെതിരെ ശക്തമായി പ്രതികരിക്കണമെന്നും സമദാനി ആവശ്യപ്പെട്ടു. കെപിസിസി വൈസ് പ്രസിഡണ്ട് വി ടി ബലറാം യുഡിഎഫ് സ്ഥാനാര്‍ത്ഥി പ്രഖ്യാപനം നടത്തി. യുഡിഎഫ് ചെയര്‍മാന്‍ കുഞ്ഞുമുഹമ്മദ് കടവനാട് അധ്യക്ഷത വഹിച്ചു. കെപിസിസി ജനറല്‍ സെക്രട്ടറി കെ പി നൗഷാദലി, മുന്‍ എംപി സി ഹരിദാസ്, സി എം യൂസഫ്, സുഹറ മമ്പാട്, എം പി ശ്രീധരന്‍, എം അബ്ദുല്ലത്തീഫ്, കെ ശിവരാമന്‍, കുഞ്ഞുമോന്‍ ഹാജി, എന്‍ എ ജോസഫ്, ഫര്‍ഹാന്‍ബിയ്യം, കെ പി അബ്ദുല്‍ ജബ്ബാര്‍, എ പവിത്രകുമാര്‍, എന്‍ പി നബില്‍,മുസ്തഫ വടമുക്ക്, കെ ആര്‍ റസാക്ക്, ടി റഫീഖ് എന്നിവര്‍ സംസാരിച്ചു. മാര്‍ക്‌സിസ്റ്റ് പാര്‍ട്ടിയില്‍ നിന്നും രാജിവച്ച നളിനി സരോജത്തെയും, അഡ്വ: വാസുദേവനെയും സമദാനിയും, ബലറാമും യുഡിഎഫ് കണ്‍വെന്‍ഷനില്‍ അനുമോദിച്ചു.
