റോബോട്ടിക് ഒളിംപിക്സ്: മലയാളി വിദ്യാര്‍ഥികളുടെ കരുത്തില്‍ യുഎഇയ്ക്ക് സ്വര്‍ണം
റോബോട്ടിക് ഒളിംപിക്സ് എന്നറിയപ്പെടുന്ന ‘ഫസ്റ്റ് ഗ്ലോബല്‍ ചാലഞ്ചി’ല്‍ മലയാളിക്കരുത്തില്‍ യുഎഇക്ക് സ്വര്‍ണം. രണ്ട് മലയാളി വിദ്യാര്‍ഥികളടക്കം അംഗങ്ങളെല്ലാം ഇന്ത്യക്കാരായ യുഎഇ ടീമിനെ പരിശീലിപ്പിച്ചത് കൊച്ചി ആസ്ഥാനമായുള്ള സ്റ്റാര്‍ട്ടപ്പായ യുണീക് വേള്‍ഡ് റോബോട്ടിക്സാണ്. നാല് ദിവസങ്ങളിലായി പനാമയില്‍ നടന്ന റോബോട്ടിക് ഒളിംപിക്സില്‍ 193 രാജ്യങ്ങളിലെ ടീമുകളോട് മത്സരിച്ചാണ് മലയാളികളടങ്ങിയ ദുബായ് ടീം സ്വര്‍ണം കരസ്ഥമാക്കിയത്. ഫെഡെക്സ് സ്ഥാപകന്‍ ഫ്രെഡ് സ്മിത്തിന്റെ പേരിലുള്ള ഫ്രെഡ് സ്മിത്ത് ഗ്ലോബല്‍ ഇന്നവേറ്റര്‍ അവാര്‍ഡിനാണ് യുഎഇ ടീം അര്‍ഹരായത്. യുഎഇയുടെ ദേശീയ വൃക്ഷമായ ഗാഫ് മരത്തിന്റെ സംരക്ഷണത്തിന് വേണ്ടി തയ്യാറാക്കിയ പ്രോജക്റ്റായ ‘സ്റ്റാഷ്’ ആണ് യുഎഇ ടീമിനെ ജേതാക്കളാക്കിയത്.
കൊച്ചി ആസ്ഥാനമായുള്ള യുണീക് വേള്‍ഡ് റോബോട്ടിക്സിന് ദുബായിലും ബ്രാഞ്ച് ഉണ്ട്. അവിടെ പരിശീലനം നേടിയ 8 വിദ്യാര്‍ഥികളാണ് യുഎഇ ടീമിനായി ഫസ്റ്റ് ഗ്ലോബല്‍ ചാലഞ്ചില്‍ മത്സരിച്ചത്. തിരുവനന്തപുരം സ്വദേശികളായ ആനന്ദ് സദാശിവ അയ്യര്‍, വിദ്യ കൃഷ്ണന്‍ എന്നിവരുടെ മകനായ ആദിത്യ ആനന്ദ്, ഡോ. ബിനോയ് വടക്കേനെല്ലിശ്ശേരി, ഡോ. നീതു രാധാകൃഷ്ണ പിള്ള എന്നിവരുടെ മകളായ ശ്രേയ ബിനോയ് നായര്‍ എന്നിവരായിരുന്നു യുഎഇ ടീമിലെ മലയാളികള്‍. ന്യൂ മിലേനിയം സ്‌കൂള്‍ വിദ്യാര്‍ഥിയാണ് ആദിത്യ, ജെംസ് മോഡേണ്‍ അക്കാദമിയിലെ വിദ്യാര്‍ഥിയാണ് ശ്രേയ. ടീമിന്റെ പരിശീലകരിലൊരാളായ മുഹമ്മദ് മുക്താറും മലയാളിയാണ്.
ഇന്റര്‍നാഷനല്‍ ഫസ്റ്റ് കമ്മിറ്റി അസോസിയേഷന്‍ 2016 മുതല്‍ വര്‍ഷം തോറും സംഘടിപ്പിക്കുന്ന റോബോട്ടിക്സ് മത്സരമാണ് ഫസ്റ്റ് ഗ്ലോബല്‍ ചാലഞ്ച്. സയന്‍സ്, ടെക്‌നോളജി, എന്‍ജിനീയറിങ്, മാത്തമാറ്റിക്സ് അഥവാ സ്റ്റെം വിദ്യാഭ്യാസം വഴി ആഗോള വെല്ലുവിളികളെ നേരിടാന്‍ യുവത്വത്തിന്റെ ബുദ്ധിപരമായ കഴിവുകള്‍ സംയോജിപ്പിക്കുകയാണ് ഫസ്റ്റ് ഗ്ലോബല്‍ ചാലഞ്ചിന്റെ ലക്ഷ്യം.
കേരള സ്റ്റാര്‍ട്ടപ്പ് മിഷന് കീഴില്‍ രജിസ്റ്റര്‍ ചെയ്ത സ്റ്റാര്‍ട്ടപ്പുകള്‍ വിവിധ രാജ്യങ്ങളിലേക്കു പ്രവര്‍ത്തനം വ്യാപിപ്പിച്ചു നേട്ടം കൊയ്യുന്നതിന്റെ ഉദാഹരണമാണു യുണീക് വേള്‍ഡ് റോബോട്ടിക്സിന്റെ നേട്ടം. പ്രമുഖ ശാസ്ത്രജ്ഞര്‍, മസാച്യുസെറ്റ്‌സ് ഇന്‍സ്റ്റിറ്റ്യൂട്ട് ഓഫ് ടെക്‌നോളജിയിലെ പ്രൊഫസര്‍മാര്‍ എന്നിവര്‍ക്കു മുന്‍പില്‍ പ്രോജക്റ്റ് അവതരിപ്പിച്ച് വിജയിക്കാന്‍ കഴിഞ്ഞത് തുടര്‍പ്രവര്‍ത്തനങ്ങള്‍ക്കു ശക്തി പകരുമെന്ന് യുണീക് വേള്‍ഡ് റോബോട്ടിക്സ് സ്ഥാപകന്‍ ബന്‍സണ്‍ തോമസ് ജോര്‍ജ് പറഞ്ഞു.
