കൂച്ച് ബെഹാര് ട്രോഫി; ഹൈദരാബാദിനെതിരെ കേരളം ആദ്യ ഇന്നിങ്സില് 268ന് പുറത്ത്
ഹൈദരാബാദ്: 19 വയസ്സില് താഴെയുള്ളവർക്കായുള്ള കൂച്ച് ബെഹാർ ട്രോഫിയില് ഹൈദരാബാദിനെതിരെ കേരളത്തിൻ്റെ ആദ്യ ഇന്നിങ്സ് 268ന് അവസാനിച്ചു.
അർദ്ധ സെഞ്ച്വറികള് നേടിയ ജോബിൻ ജോബിയുടെയും അമയ് മനോജിൻ്റെയും ഇന്നിങ്സുകളാണ് കേരളത്തിന് ഭേദപ്പെട്ട സ്കോർ സമ്മാനിച്ചത്. മറുപടി ബാറ്റിങ്ങിന് ഇറങ്ങിയ ഹൈദരാബാദ് ആദ്യ ദിവസം കളി നിർത്തുമ്ബോള് ഒരു വിക്കറ്റിന് 71 റണ്സെന്ന നിലയിലാണ്.
ടോസ് നേടി ബാറ്റിങ് തെരഞ്ഞെടുത്ത കേരളത്തിന് വേണ്ടി കെ ആർ രോഹിതും ജോബിൻ ജോബിയും ചേർന്നാണ് ഇന്നിങ്സ് തുറന്നത്. എന്നാല് ഒരു റണ്ണെടുത്ത രോഹിത് തുടക്കത്തില് തന്നെ മടങ്ങി. രണ്ടാം വിക്കറ്റില് ജോബിൻ ജോബിയും ഹൃഷികേശും ചേർന്ന് 78 റണ്സ് കൂട്ടിച്ചേർത്തു. എന്നാല് അടുത്തടുത്ത ഓവറുകളില് ഇരുവരും പുറത്തായത് കേരളത്തിന് തിരിച്ചടിയായി. ജോബിൻ ജോബി 62ഉം ഹൃഷികേശ് 26ഉം റണ്സെടുത്തു. തുടർന്നെത്തിയ മാനവ് കൃഷ്ണ ഒൻപതും മാധവ് കൃഷ്ണ എട്ടും റണ്സെടുത്ത് പുറത്തായി.
എന്നാല് അമയ് മനോജും മൊഹമ്മദ് ഇനാനും ചേർന്നുള്ള കൂട്ടുകെട്ട് 47 റണ്സ് കൂട്ടിച്ചേർത്തു. അമയ് 10 ബൗണ്ടറികളടക്കം 57 റണ്സ് നേടി. മറുവശത്ത് ഏകദിന ശൈലിയില് ബാറ്റ് വീശിയ മൊഹമ്മദ് ഇനാൻ 37 പന്തുകളില് അഞ്ച് ഫോറും ഒരു സിക്സുമടക്കം 38 റണ്സ് നേടി. വാലറ്റം കാര്യമായ സംഭാവനകളില്ലാതെ മടങ്ങിയെങ്കിലും ഒരറ്റത്ത് ഉറച്ച് നിന്ന തോമസ് മാത്യുവിൻ്റെ പ്രകടനമാണ് കേരളത്തിൻ്റെ സ്കോർ 268ല് എത്തിച്ചത്. തോമസ് മാത്യു 26 റണ്സെടുത്തു. ഹൈദരാബാദിന് വേണ്ടി യഷ് വീർ മൂന്നും രാഹുല് കാർത്തികേയ, ദേവ് മേത്ത, അകുല സായ് ചന്ദ്ര എന്നിവർ രണ്ട് വിക്കറ്റ് വീതവും വീഴ്ത്തി.
മറുപടി ബാറ്റിങ്ങിന് ഇറങ്ങിയ ഹൈദരാബാദിന് ക്യാപ്റ്റൻ ആരോണ് ജോർജ് മികച്ച തുടക്കം നല്കി. ആദ്യ ദിവസം കളി നിർത്തുമ്ബോള് ഹൈദരാബാദ് ഒരു വിക്കറ്റ് നഷ്ടത്തില് 71 റണ്സെന്ന നിലയിലാണ്. മലയാളിയും ഇന്ത്യൻ അണ്ടർ 19 ടീമംഗവുംകൂടിയായ ആരോണ് ജോർജ് 35 പന്തുകളില് നിന്ന് 42 റണ്സുമായി പുറത്താകാതെ നില്ക്കുകയാണ്. 18 റണ്സോടെ സിദ്ദാർത്ഥ് റാവുവാണ് ഒപ്പം ക്രീസില്. ഒൻപത് റണ്സെടുത്ത മോട്ടി ജശ്വന്താണ് പുറത്തായത്.
