മുന്കൂര് ജാമ്യാപേക്ഷ ഇന്ന് കോടതി പരിഗണിക്കും
ബലാത്സംഗ കേസില് പാലക്കാട് എംഎല്എ രാഹുല് മാങ്കൂട്ടത്തിലിന്റെ മുന്കൂര് ജാമ്യാപേക്ഷ തിരുവനന്തപുരം ജില്ലാ സെഷന്സ് കോടതി ഇന്ന് പരിഗണിക്കും. ജാമ്യാപേക്ഷയില് വാദം അടച്ചിട്ട മുറിയില് കേള്ക്കണമെന്ന് രാഹുല് പ്രോസിക്യൂഷനും ആവശ്യപ്പെട്ടിട്ടുണ്ട്. ഇക്കാര്യത്തില് കോടതി ഇന്ന് തീരുമാനമെടുക്കും.
രാഹുലിന് ജാമ്യം നല്കുന്നതിനെ ശക്തമായി എതിര്ക്കാനാണ് പൊലീസിന്റെ തീരുമാനം. ഡിജിറ്റല് തെളിവുകളടക്കം അന്വേഷണസംഘം കോടതിയില് ഹാജരാക്കും. നേരത്തെ രാഹുലും മുദ്ര വെച്ച കവറില് തെളിവുകള് കോടതിക്ക് സമര്പ്പിച്ചിട്ടുണ്ട്. പൊലീസ് കേസെടുത്തതിന് പിന്നാലെ ഏഴുദിവസമായി രാഹുല് ഒളിവിലാണ്. ഇതിനിടെയാണ് മറ്റൊരു യുവതി കൂടി രാഹുല്നെതിരെ പീഡന പരാതിയുമായി കെപിസിസി നേതൃത്വത്തെ സമീപിച്ചത്. ഈ പരാതി കെപിസിസി ഡിജിപിക്ക് കൈമാറിയിട്ടുണ്ട്. യുവതിയെ നേരില് കണ്ട് പരാതി നല്കാന് പൊലീസ് ആവശ്യപ്പെടും. ഇതിനുശേഷമാകും കേസെടുക്കുന്ന കാര്യത്തില് തീരുമാനമെടുക്കുക.
അതേസമയം, അതിജീവിതയെ അധിക്ഷേപിച്ച കേസില് രാഹുല് ഈശ്വറിന്റെ ജാമ്യ അപേക്ഷയും തിരുവന്തപുരം ജില്ലാ സെഷന്സ് കോടതി ഇന്ന് പരിഗണിച്ചേക്കും. നിലവില് സെന്ട്രല് ജയിലിലേക്ക് രാഹുല് ഈശ്വറിനെ മാറ്റിയിരുന്നു. താന് നിരാഹര സമരത്തിലാണെന്ന് രാഹുല് സൂപ്രണ്ടിന് എഴുതി നല്കുകയായിരുന്നു. ഈ സാഹചര്യത്തില് രാഹുലിനെ നിരീക്ഷിക്കണമെന്ന് ജയില് വകുപ്പ് തീരുമാനിക്കുകയും പൂജപ്പുര ജില്ലാ ജയിലില് നിന്ന് സെന്ട്രല് ജയിലിലേക്ക് മാറ്റുകയുമായിരുന്നു. ഇവിടെ ഡോക്ടറുടെ സേവനവും രാഹുല് ഈശ്വറിന് ലഭിക്കുമെന്നാണ് റിപ്പോര്ട്ട്. നിലവില് വെള്ളം മാത്രം കുടിച്ചാണ് രാഹുല് ജയിലില് കഴിയുന്നത്.
