സി കെ ഹമീദ് നിയാസ് തിരൂർ നിയോജകമണ്ഡലം മുസ്ലിംലീഗ് സെക്രട്ടറി; പിതാവിൻ്റെ പൈതൃകം കാത്ത് കർമ്മ രംഗത്ത് മകനും
തിരൂർ: സാധാരണ ജനങ്ങളുടെ പ്രിയങ്കരനായിരുന്ന മർഹൂം സി.കെ. കുഞ്ഞു ഹാജി സാഹിബിൻ്റെ മകൻ സി കെ ഹമീദ് നിയാസ് തിരൂർ നിയോജകമണ്ഡലം മുസ്ലിംലീഗിന്റെ സെക്രട്ടറിയായി പാണക്കാട് സയ്യിദ് സാദിഖ് അലി ശിഹാബ് തങ്ങൾ നോമിനേറ്റ് ചെയ്തു. പതിറ്റാണ്ടുകളുടെ സംഘടനാ പ്രവർത്തന പരിചയവുമായാണ് അദ്ദേഹം ഈ സുപ്രധാന പദവിയിലേക്ക് എത്തുന്നത്. മുസ്ലിംലീഗിന്റെ സമുന്നതരായ നേതാവും മന്ത്രിയുമായിരുന്ന അഹമ്മദ് ഗുരുക്കളുടെ ബന്ധുവുമാണ് നിയാസ് സി.കെ. എങ്കിലും, അത്തരത്തിലുള്ള ബന്ധങ്ങളൊന്നും അദ്ദേഹം തൻ്റെ നേട്ടങ്ങൾക്കായി ഉപയോഗിച്ചിട്ടില്ല. പാർട്ടി തീരുമാനങ്ങളും പാണക്കാട് നിന്നുള്ള നിർദ്ദേശങ്ങളുമാണ് അദ്ദേഹം എന്നും പിന്തുടർന്ന മാതൃക.
നിയാസ് സി.കെ.യുടെ പൊതുപ്രവർത്തന ജീവിതം 1985-ൽ തിരൂർ ബോയ്സ് ഹൈസ്കൂളിൽ നിന്നാണ് ആരംഭിക്കുന്നത്. എട്ടാം ക്ലാസ്സിൽ എം.എസ്.എഫിന്റെ സാരഥിയായി മത്സരിച്ച് വിജയിച്ചാണ് അദ്ദേഹം രാഷ്ട്രീയത്തിൽ പ്രവേശിക്കുന്നത്. തുടർന്ന്, വെട്ടത്ത് പഞ്ചായത്ത് എം.എസ്.എഫ് കമ്മിറ്റിയുടെ ട്രഷററായും അദ്ദേഹം പ്രവർത്തിച്ചു. ഈ കാലയളവിൽ വെട്ടത്ത് പഞ്ചായത്ത് യൂത്ത് ലീഗിന്റെ ട്രഷററായും പിന്നീട് പ്രസിഡന്റായും അദ്ദേഹം നേതൃത്വം നൽകി.
ജില്ലാ യൂത്ത് ലീഗ് നേതൃനിരയിലും അദ്ദേഹം സജീവമായിരുന്നു. തിരൂർ നിയോജകമണ്ഡലം മുസ്ലിം യൂത്ത് ലീഗ് പ്രസിഡണ്ട്, വെട്ടം പഞ്ചായത്ത് മുസ്ലിം ലീഗ് ജനറൽ സെക്രട്ടറി, ജില്ലാ യൂത്ത് ലീഗിന്റെ വൈസ് പ്രസിഡന്റ്, സീനിയർ വൈസ് പ്രസിഡന്റ് എന്നീ പദവികളിൽ പ്രവർത്തിച്ച നിയാസ് സി.കെ., ഈ കാലയളവിലുടനീളം സംസ്ഥാന വർക്കിംഗ് കമ്മിറ്റിയിലും അംഗമായിരുന്നു. യൂത്ത് ലീഗ് നേതൃത്വത്തിൽ ട്രഷറർ സ്ഥാനത്തേക്ക് വന്ന ഒഴിവിലേക്ക് അന്നത്തെ ജില്ലാ മുസ്ലിംലീഗ് പ്രസിഡന്റ് സയ്യിദ് സാദിഖലി ശിഹാബ് തങ്ങൾ നേരിട്ടാണ് അദ്ദേഹത്തെ നോമിനേറ്റ് ചെയ്തത്.
വർഷങ്ങളോളമായി പൊതുരംഗത്ത് സജീവമാണെങ്കിലും പാർലമെന്ററി രാഷ്ട്രീയ രംഗത്തേക്ക് അദ്ദേഹം ഇതുവരെ വന്നിട്ടില്ല. നിരവധി അവസരങ്ങൾ ലഭിച്ചിട്ടുണ്ടെങ്കിലും പല സമയങ്ങളിലും മറ്റ് ആളുകൾക്ക് വേണ്ടി മാറി കൊടുക്കുകയായിരുന്നു. തിരൂർ സി.എച്ച്. സെന്ററിന്റെ ശില്പികളിൽ ഒരാളും അതിന്റെ സെക്രട്ടറിയുമാണ് അദ്ദേഹം. നിലവിൽ വെട്ടം ആലിശ്ശേരി കേന്ദ്രമായി പ്രവർത്തിക്കുന്ന കുഞ്ഞു ഹാജി സ്മാരക സാംസ്കാരിക വേദിയുടെ സെക്രട്ടറിയും കൂടിയാണ് നിയാസ് സി.കെ. ഇതുകൂടാതെ, സാമൂഹിക, സാംസ്കാരിക, മത രംഗത്തെല്ലാം അദ്ദേഹം സജീവമാണ്. മദ്രസ സെക്രട്ടറി, മഹല്ല് ഭാരവാഹി എന്നീ നിലകളിലെല്ലാം അദ്ദേഹം പ്രവർത്തിക്കുകയും പ്രവർത്തിച്ചു കൊണ്ടിരിക്കുകയും ചെയ്യുന്നു.
നിയാസിന്റെ പിതാവ് മർഹൂം സി.കെ. കുഞ്ഞു ഹാജി സാഹിബ് മണ്ഡലം മുസ്ലിംലീഗിന്റെ ജനറൽ സെക്രട്ടറിയും മലപ്പുറം ജില്ലാ ഡിസ്ട്രിക്റ്റ് കൗൺസിലറുമായിരുന്നു. സാധാരണക്കാരുമായി അടുത്ത ബന്ധം പുലർത്തുകയും മണ്ഡലത്തിലെ ജനകീയ പ്രശ്നങ്ങൾക്ക് പരിഹാരം കാണാൻ ഓടിനടക്കുകയും ചെയ്ത നേതാവായിരുന്നു അദ്ദേഹം.
എം.എസ്.എഫ്. ഭാരവാഹിത്വം ഏറ്റെടുത്തപ്പോൾ പിതാവ് നൽകിയ ഉപദേശം നിയാസ് സി.കെ. എന്നും ഓർക്കാറുണ്ട്. “നിൻ്റെ പ്രവർത്തനങ്ങളിൽ സാധാരണ ജനങ്ങളെക്കുറിച്ചും അവരുടെ പ്രയാസങ്ങളെക്കുറിച്ചും എപ്പോഴും ഓർമ്മ വേണം. അവരെ പ്രയാസപ്പെടുത്തുന്ന ഒരു വാക്കോ പ്രവർത്തനമോ നിൻ്റെ ഭാഗത്തുനിന്ന് ഉണ്ടാകരുത്, അവർക്ക് സമാധാനം നൽകുന്ന വാക്കുകളും പ്രവർത്തനങ്ങളുമാണ് ഉണ്ടാകേണ്ടത്” എന്ന പിതാവിൻ്റെ വാക്കുകളാണ് അദ്ദേഹത്തെ സാമൂഹ്യപ്രവർത്തന രംഗത്ത് പിടിച്ചുനിർത്തുന്ന പ്രധാന പ്രചോദനം. സാമ്പത്തിക അഭിവൃദ്ധിയോ വലിയ ബന്ധങ്ങളോ ഉണ്ടായിട്ടും സാധാരണ ജനങ്ങളുമായുള്ള ബന്ധം വിച്ഛേദിക്കാതെ മുന്നോട്ട് പോകാൻ ഈ ഉപദേശം അദ്ദേഹത്തിന് എന്നും വഴികാട്ടിയായി.
പിതാവിൻ്റെ ജനസേവന പൈതൃകം തുടരുന്ന നിയാസ് സി.കെ.യുടെ പുതിയ ദൗത്യം തിരൂർ മണ്ഡലത്തിലെ പാർട്ടി പ്രവർത്തനങ്ങൾക്ക് പുത്തൻ ഉണർവ് നൽകുമെന്നാണ് പ്രതീക്ഷ.