നല്ല കിടിലൻ ലുക്ക്.. ഇവൻ വില്ലൻ ആയിരിക്കുമോ? ചത്താ പച്ചയിലെ റോഷൻ മാത്യു ഇതാ
മലയാളി സിനിമാപ്രേമികള് കാത്തിരിക്കുന്ന സിനിമയാണ് അർജുൻ അശോകൻ ചിത്രമായ ചത്താ പച്ച- റിങ് ഓഫ് റൗഡിസ്. മലയാളത്തിലെ ആദ്യത്തെ മുഴുനീള WWE സ്റ്റൈല് ആക്ഷൻ ചിത്രമായി ഒരുങ്ങുന്ന സിനിമ 115 ലധികം രാജ്യങ്ങളില് റിലീസ് ചെയ്യാൻ ആണ് പ്ലാൻ.ഇപ്പോഴിതാ സിനിമയില് റോഷൻ മാത്യുവും പ്രധാന വേഷത്തില് എത്തുന്നുണ്ട്. വെട്രി എന്ന കഥാപാത്രത്തെയാണ് നടൻ അവതരിപ്പിക്കുന്നത്. സോഷ്യല് മീഡിയയില് പോസ്റ്റ് പങ്കിട്ട് അണിയറപ്രവർത്തകർ തന്നെയാണ് ഇക്കാര്യം അറിയിച്ചിരിക്കുന്നത്.
ചിത്രത്തില് മമ്മൂട്ടി എത്തുന്നതായാണ് റിപ്പോർട്ടുകള് പ്രചരിച്ചിരുന്നു. സിനിമയില് റസ്ലിങ്ങ് കോച്ച് ആയിട്ടാണ് മമ്മൂട്ടി എത്തുന്നതെന്നാണ് റിപ്പോട്ടുകള്. സിനിമയില് നിർണ്ണായകമായ ഒരു ഘട്ടത്തിലാണ് ഈ കഥാപാത്രത്തിൻ്റെ കടന്നുവരവ് എന്നാണു സൂചന. ചിത്രത്തിൻ്റെ അണിയറ പ്രവർത്തകർ ഈ റിപ്പോർട്ട് ഔദ്യോഗികമായി സ്ഥിരീകരിച്ചില്ല. അതിഥി വേഷമാണെന്ന് ചില റിപ്പോർട്ടുകള് ഉണ്ടെങ്കിലും അഞ്ചു ദിവസത്തോളം അഭിനയിക്കേണ്ട സുപ്രധാനമായ കഥാപാത്രമാണ് മമ്മൂട്ടിയുടേത് എന്നും സൂചനയുണ്ട്. നിലവില് മഹേഷ് നാരായണ് സിനിമയുടെ സെറ്റിലാണ് മമ്മൂട്ടി.
ഇതിന് ശേഷമായിരിക്കും മമ്മൂട്ടി ചത്താ പച്ച സിനിമയുടെ സെറ്റില് എത്തുന്നതെന്നും റിപ്പോർട്ടുകളില് പറയുന്നു.പാൻ ഇന്ത്യൻ റെസ്ലിങ് ആക്ഷൻ കോമഡി എന്റർടെയ്നർ ആയി ഒരുക്കുന്ന ഈ ചിത്രം, ട്രാൻസ് വേള്ഡ് ഗ്രൂപ്, ലെൻസ്മാൻ ഗ്രൂപ്പ് എന്നിവർ കൂടി ചേർന്ന് രൂപം നല്കിയ റീല് വേള്ഡ് എന്റർടെയ്ൻമെന്റ് ആണ് നിർമ്മിക്കുന്നത്. ട്രാൻസ് വേള്ഡ് ഗ്രൂപ്പിന്റെ രമേഷ്, റിതേഷ് രാമകൃഷ്ണൻ, ലെൻസ്മാൻ ഗ്രൂപ്പിന്റെ ഷിഹാൻ ഷൌക്കത്ത് എന്നിവർക്കൊപ്പം ഈ ചിത്രത്തിന്റെ നിർമ്മാണ പ്രക്രിയയില്, മമ്മൂട്ടി കമ്ബനിയുടെ നേതൃനിരയിലുള്ള എസ് ജോർജ്, സുനില് സിങ് എന്നിവരും പങ്കാളികളാകുന്നുണ്ട്.ആഗോള തലത്തില് കോടികണക്കിന് ആരാധകരുള്ള റിങ് റെസ്ലിംഗ് കഥാപാത്രങ്ങളില് നിന്നും അതിന്റെ ആരാധകരില് നിന്നും പ്രചോദനം ഉള്ക്കൊണ്ട് ഒരുക്കുന്ന ഈ ചിത്രം സംവിധാനം ചെയ്യുന്നത് ജീത്തു ജോസഫിന്റെ സംവിധാന സഹായിയായിരുന്ന അദ്വൈത് നായർ ആണ്. സൂപ്പർ താരം മോഹൻലാലിന്റെ അനന്തരവനായ അദ്വൈതിന്റെ കന്നി സംവിധാന സംരംഭം കൂടിയാണ് ‘ചത്താ പച്ച- റിങ് ഓഫ് റൗഡിസ്’. ഫോർട്ട് കൊച്ചിയിലുള്ള ഒരു അണ്ടർ ഗ്രൗണ്ട് WWE സ്റ്റൈല് റെസ്ലിങ് ക്ലബും അവിടെയെത്തുന്ന കഥാപാത്രങ്ങളെയും അടിസ്ഥാനമാക്കിയാണ് ചിത്രത്തിന്റെ കഥ പറയുന്നത്. ചിത്രത്തിന് വേണ്ടി താരങ്ങളായ അർജുൻ അശോകൻ, റോഷൻ മാത്യു, ഇഷാൻ ഷൗക്കത്, വിശാഖ് നായർ എന്നിവർ റെസ്ലിങ് ട്രെയിനിങ് നേടിയിരുന്നു.
