ഒഴിവായത് വൻ ദുരന്തം; എയര് ഇന്ത്യ എക്സ്പ്രസിൻ്റെ ടയറുകള് പൊട്ടിത്തെറിച്ചു,കൊച്ചിയില് അടിയന്തര ലാന്ഡിങ്
കൊച്ചി: കൊച്ചി നെടുമ്ബാശ്ശേരി വിമാനത്താവളത്തില് അടിയന്തര ലാന്ഡിങ്. എയര് ഇന്ത്യ എക്സ്പ്രസ് വിമാനത്തിന്റെ ടയറുകള് പൊട്ടിത്തെറിച്ചതിനെ തുടർന്നാണ് അടിയന്തര ലാന്ഡിങ് നടത്തിയത്.തലനാരിഴയ്ക്കാണ് ദുരന്തം വഴിമാറിയത്.
ലാൻഡിങ് ഗിയറില് സാങ്കേതിക പ്രശ്നം ഉണ്ടായതിനെത്തുടർന്നാണ് കൊച്ചിയിലേക്ക് അടിയന്തര ലാൻഡിങ്ങിനു വിമാനം ശ്രമിച്ചത്. ജിദ്ദ – കരിപ്പൂർ വിമാനമാണ് അടിയന്തരമായി ലാന്ഡ് നടത്തിയത്. ഇന്ന് രാവിലെ 9 മണിയോടെയാണ് സംഭവം. വിമാനത്തിലുണ്ടായിരുന്ന 160 യാത്രക്കാരും സുരക്ഷിതരാണെന്ന് സിയാല് അറിയിച്ചു.
ലാൻഡിങ്ങിനു ശേഷമുള്ള പരിശോധനയിലാണ് ടയറുകള് പൊട്ടിത്തെറിച്ചത് കണ്ടെത്തിയത്. നിലവില് വിമാനത്താവളത്തിന് അകത്തുള്ള യാത്രക്കാരെ മറ്റൊരു വിമാനം എത്തിച്ച് കരിപ്പൂരിലേക്ക് എത്തിക്കുമെന്നാണ് ഇപ്പോള് അറിയിച്ചിരിക്കുന്നത്. അതിനു സാധിച്ചില്ലെങ്കില് റോഡ് മാർഗം എത്തിക്കും.