നിയമസഭാ തെരഞ്ഞെടുപ്പ് നിരക്ക് ചാര്ട്ട്: രാഷ്ട്രീയ പാര്ട്ടികളുടെ യോഗം ചേര്ന്നു
നിയമസഭാ തെരഞ്ഞെടുപ്പ് ചെലവ് നിയന്ത്രണത്തിന്റെ ഭാഗമായി പ്രചാരണ സാമഗ്രികളുടെയും മറ്റ് സംവിധാനങ്ങളുടെയും നിരക്ക് ചാര്ട്ട് പ്രസിദ്ധീകരിക്കുന്നതുമായി ബന്ധപ്പെട്ട് മലപ്പുറം ജില്ലയില് ജില്ലാ തെരഞ്ഞെടുപ്പ് ഉദ്യോഗസ്ഥന് കൂടിയായ ജില്ലാ കളക്ടര് ഡോ. വിനയ് ഗോയലിന്റെ അധ്യക്ഷതയില് രാഷ്ട്രീയ പാര്ട്ടി പ്രതിനിധികളുടെ യോഗം ചേര്ന്നു.
തെരഞ്ഞെടുപ്പ് പ്രചാരണവുമായി ബന്ധപ്പെട്ട സാധന സാമഗ്രികളുടെയും സേവനങ്ങളുടെയും ചെലവുകള് ഉള്ക്കൊള്ളുന്നതാണ് നിരക്ക് ചാര്ട്ട്. പ്രചാരണത്തിന് ഉപയോഗിക്കുന്ന പോസ്റ്ററുകള്, ബാനറുകള്, ബോര്ഡുകള്, ചുവരെഴുത്തുകള്, വാഹനങ്ങള്, ഹാളുകള്, സ്റ്റേജ്, സൗണ്ട് സിസ്റ്റം, കസേരകള്, എല്.ഇ.ഡി. വാള് ഉള്പ്പെടെയുള്ള സംവിധാനങ്ങള്, സോഷ്യല് മീഡിയ പ്രചാരണം, മാധ്യമങ്ങളിലൂടെയും മറ്റുമുള്ള പരസ്യങ്ങള് തുടങ്ങിയവയുടെ നിരക്കുകളെ കുറിച്ച് പാര്ട്ടി പ്രതിനിധികളുമായി ചര്ച്ച ചെയ്തു. പാര്ട്ടി പ്രതിനിധികള് മുന്നോട്ടുവച്ച നിര്ദ്ദേശങ്ങള് കൂടി കണക്കിലെടുത്ത് അന്തിമ നിരക്ക് ചാര്ട്ട് പ്രസിദ്ധീകരിക്കും.
ജില്ലാ കളക്ടറുടെ ചേംബറില് നടന്ന യോഗത്തില് എക്സ്പെന്ഡിച്ചര് നോഡല് ഓഫീസര് കൂടിയായ സീനിയര് ഫിനാന്സ് ഓഫീസര്, വിവിധ രാഷ്ട്രീയപാര്ട്ടി പ്രതിനിധികള് തുടങ്ങിയവര് പങ്കെടുത്തു.
