സോളോ ഹിറ്റടിച്ച് രാധിക; 50 കോടി ക്ലബ്ബില് ‘തായ്കിഴവി’, ഗംഭീര അഭിപ്രായം
തമിഴ് സിനിമാലോകത്തെ ഇപ്പോഴത്തെ ചർച്ച മുഴുവൻ തായ്കിഴവി എന്ന ചിത്രത്തെ കുറിച്ചാണ്. സൂപ്പർതാരം ശിവകാർത്തികേയൻ നിർമിച്ച് ശിവകുമാർ മുരുകേശൻ സംവിധാനം ചെയ്ത ഈ കോമഡി ഡ്രാമ ചിത്രത്തില് രാധിക ശരത്കുമാറാണ് പ്രധാന കഥാപാത്രത്തെ അവതരിപ്പിച്ചിരിക്കുന്നത്.രാധികയുടെ മികച്ച പ്രകടനം പ്രേക്ഷകരെയൊന്നാകെ വിസ്മയിപ്പിക്കുകയാണ്. ചിത്രത്തില് 80 വയസ്സുകാരിയുടെ റോളിലാണ് രാധിക എത്തുന്നത്. പത്ത് ദിവസം കൊണ്ട് ആഗോളതലത്തില് ചിത്രം 50 കോടി ക്ലബ്ബില് ഇടം പിടിച്ചിരിക്കുകയാണ്.
ആദ്യ ദിനം ചിത്രം 3 കോടിക്കടുത്ത് കളക്ഷൻ നേടിയിരുന്നു. പാഷൻ സ്റ്റുഡിയോസും ശിവകാർത്തികേയൻ പ്രൊഡക്ഷൻസും സംയുക്തമായാണ് ചിത്രം നിർമ്മിച്ചിരിക്കുന്നത്. ‘തായ് കിഴവി’യുടെ വലിയ വിജയത്തിന് പിന്നാലെ സംവിധായകൻ ശിവകുമാർ മുരുഗേശൻ ഒരുക്കുന്ന അടുത്ത ചിത്രത്തില് ശിവകാർത്തികേയൻ തന്നെയാണ് നായകൻ. ‘സേയോണ്’ എന്ന് പേരിട്ടിരിക്കുന്ന ഈ ബിഗ് ബജറ്റ് ചിത്രം നിർമ്മിക്കുന്നത് ഉലകനായകൻ കമല് ഹാസനും ആർ. മഹേന്ദ്രനും ചേർന്നാണ്.
അതേസമയം, പണമിടപാടുകാരിയായ പാവുണുതായി എന്ന കഥാപാത്രമായാണ് രാധിക ചിത്രത്തിലെത്തിയത്. അത്യാഗ്രഹിയായ ആണ് മക്കള് പാവുണുതായിയുടെ സ്വത്തുക്കള് സ്വന്തം പേരിലേക്ക് മാറ്റാൻ ശ്രമിക്കുന്നതിനും അതിനെ എതിർക്കുന്നതുമാണ് ചിത്രം പറയുന്ന കഥ. സിംഗംപുലി, അരുള്ദോസ്, മുനിഷ്കാന്ത്, ബാല ശരവണൻ എന്നിവരും തായ്കിഴവിയില് പ്രധാന വേഷത്തില് എത്തുന്നുണ്ട്.
