റഷ്യന് ബന്ധത്തിന്റെ പേരില് മോദിക്ക് മേല് അമേരിക്ക സമ്മര്ദം ചെലുത്തുന്നു, ഈ ശ്രമം വിലപ്പോകില്ല: പുടിന്
റഷ്യയുമായുള്ള ബന്ധത്തിന്റെ പേരില് ഇന്ത്യയെ സമ്മര്ദ്ദത്തിലാക്കാനുള്ള അമേരിക്കന് ശ്രമം വിലപ്പോകില്ലെന്ന് റഷ്യന് പ്രസിഡന്റ് വ്ളാദിമിര് പുടിന്. ഇന്ത്യന് പ്രധാനമന്ത്രി നരേന്ദ്ര മോദിക്കുമേല് അമേരിക്ക സമ്മര്ദ്ദം ചെലുത്തുന്നത് അന്താരാഷ്ട്ര ബന്ധങ്ങള്ക്ക് ദോഷകരമാണെന്നാണ് പുടിന്റെ പ്രതികരണം. റഷ്യന് എണ്ണ വാങ്ങുന്ന കാര്യത്തില് ഇന്ത്യയ്ക്കെതിരെ അമേരിക്ക തുടരുന്ന സമ്മര്ദ്ദങ്ങളുടെ പശ്ചാത്തലത്തിലാണ് പുടിന്റെ പ്രതികരണം.
ഇന്ത്യയെ റഷ്യ കാണുന്നത് വിശ്വസ്ത പങ്കാളിയായിട്ടാണെന്ന് പുടിന് പറഞ്ഞു. ഇന്ത്യ അമേരിക്കയടക്കമുള്ള രാജ്യങ്ങളുമായി ബന്ധം പുലര്ത്തുന്നത് റഷ്യ – ഇന്ത്യ ഉഭയകക്ഷി ബന്ധത്തിന് ഭീഷണിയല്ലെന്നും പുടിന് വ്യക്തമാക്കി. ഇന്ത്യ – റഷ്യന് വ്യാപാരം വരും വര്ഷങ്ങളില് 100 ബില്യണ് ഡോളറിലെത്തുമെന്നും പുടിന് പ്രഖ്യാപിച്ചു. സെന്റ് പീറ്റേഴ്സ് ബെര്ഗില് ആഗോള വാര്ത്താ ഏജന്സികളുടെ മേധാവികളുമായുള്ള യോഗത്തില് സംസാരിക്കുകയായിരുന്നു അദ്ദേഹം.
ഇന്ത്യയുടെ സുഖോയ് Su-57 ഫൈറ്റര് ജെറ്റ് പദ്ധതിയുമായി ചേര്ന്ന് പ്രവര്ത്തിക്കാന് റഷ്യ ഒരുക്കമാണെന്നാണ് പുടിന്റെ മറ്റൊരു സുപ്രധാന പ്രഖ്യാപനം. സുഖോയ് Su- 57 ലോകത്തില് ഇന്നുള്ള ഏറ്റവും മികച്ച എയര് ക്രാഫ്റ്റാണെന്നും അദ്ദേഹം പ്രശംസിച്ചു. അഞ്ചാം തലമുറ സാങ്കേതികവിദ്യയാണ് ഇതിനായി ഉപയോഗിച്ചിട്ടുള്ളത്. ഇത് ഇരുരാജ്യങ്ങളും സ്വതന്ത്രമായി വികസിപ്പിച്ചിട്ടുള്ളതാണെറങ്കിലും തുടര്ന്ന് ഇന്ത്യയുമായി ചേര്ന്ന് പ്രവര്ത്തിക്കാന് തയ്യാറാണെന്നും പുടിന് പറഞ്ഞു.
