കേരളത്തില്‍ സര്‍ക്കാര്‍ സ്കൂളുകള്‍ കുറയുന്നതായി കേന്ദ്രം
ന്യൂഡല്‍ഹി: കേരളത്തിലെ സർക്കാർസ്കൂളുകളുടെ എണ്ണം കുറയുന്നതായി കേന്ദ്രസർക്കാരിന്റെ കണക്കുകള്‍. 2021-22 മുതല്‍ 2023-24 വരെയുള്ള കാലയളവില്‍ സംസ്ഥാനത്തെ 201 സ്കൂളുകള്‍ പൂട്ടിയതായി കേന്ദ്ര വിദ്യാഭ്യാസസഹമന്ത്രി ജയന്ത് ചൗധരി ലോക്സഭയില്‍ കെ.രാധാകൃഷ്ണനെ അറിയിച്ചു.
രാജ്യത്താകെ സർക്കാർസ്കൂളുകള്‍ പൂട്ടുന്നതുമായി ബന്ധപ്പെട്ട ചോദ്യത്തിനായിരുന്നു മറുപടി. 2021-22 വർഷത്തില്‍ 5010 സർക്കാർ സ്കൂളുകള്‍ കേരളത്തിലുണ്ടായിരുന്നുവെന്നാണ് മറുപടിയില്‍ പറയുന്നത്. എന്നാല്‍, 2023-24 ആയപ്പോഴേക്കും സ്കൂളുകളുടെ എണ്ണം 4809 ആയി കുറഞ്ഞു. രണ്ടുവർഷത്തിനുള്ളില്‍മാത്രം 201 സർക്കാർസ്കൂളുകള്‍ കുറഞ്ഞു.
2019-20-ല്‍ 5014 സർക്കാർസ്കൂളുകളുണ്ടായിരുന്നു. അത് 2020-21-ല്‍ 5020, 2021-22-ല്‍ 5010, 2022-23-ല്‍ 4811, 2023-24-ല്‍ 4809 എന്നിങ്ങനെയായെന്നും മറുപടിയില്‍ പറയുന്നു. മിക്കസംസ്ഥാനങ്ങളിലും സർക്കാർസ്കൂളുകളുടെ എണ്ണത്തില്‍ ഏറ്റക്കുറച്ചിലുകളുണ്ട്.
അതേസമയം ഛത്തീസ്ഗഢ്, തമിഴ്നാട്, രാജസ്ഥാൻ, തെലങ്കാന സംസ്ഥാനങ്ങളില്‍ അഞ്ചുവർഷത്തിനിടെ സർക്കാർസ്കൂളുകളുടെ എണ്ണംകൂടിയിട്ടുണ്ടെന്നും കേന്ദ്രം മറുപടിയില്‍ വ്യക്തമാക്കി.