ജനകീയം ‘മുഖ്യമന്ത്രി എന്നോടൊപ്പം’; ലഭിച്ചത് 4369 കോളുകള്‍
സംസ്ഥാന സര്‍ക്കാര്‍ ആരംഭിച്ച ‘മുഖ്യമന്ത്രി എന്നോടൊപ്പം’ (CM WITH ME) സിറ്റിസണ്‍ കണക്‌ട് സെന്ററിന്റെ പ്രവര്‍ത്തനം ജനകീയം.പ്രവര്‍ത്തനം ആരംഭിച്ച ശേഷം 30 ന് വൈകിട്ട് 6.30 വരെ ലഭിച്ചത് 4369 കോളുകളാണ്. 30 ന് പുലര്‍ച്ചെ 12 മുതല്‍ വൈകിട്ട് 6.30 വരെ മാത്രം 3007 കോളുകളാണ് വന്നത്. ഇതില്‍ 2940 എണ്ണവും ജനങ്ങള്‍ നേരിട്ട് വിളിച്ച ഇന്‍ബൗണ്ട് കോളുകളാണ്.
തദ്ദേശ സ്വയംഭരണ വകുപ്പ്, റവന്യൂ വകുപ്പ് എന്നിവയുമായി ബന്ധപ്പെട്ട വിഷയങ്ങളിലായിരുന്നു കൂടുതല്‍ കോളുകള്‍. ലൈഫ് പദ്ധതി, കെട്ടിട നിര്‍മ്മാണ പെര്‍മിറ്റുകള്‍, നികുതി, സര്‍ട്ടിഫിക്കറ്റുകള്‍ ലഭിക്കുന്നതിലെ കാലതാമസം തുടങ്ങിയ ആവശ്യങ്ങള്‍ ഉന്നയിച്ചാണ് നിരവധി പേര്‍ ബന്ധപ്പെട്ടത്. കൂടാതെ, ‘മുഖ്യമന്ത്രിയെ നേരിട്ട് വിളിച്ച്‌ സംസാരിക്കാന്‍ കഴിയുമോ?’ വിദ്യാരംഭം കുറിക്കാന്‍ മുഖ്യമന്ത്രി അനുവദിക്കുമോ?എന്ന സംശയങ്ങളും ഉണ്ടായി.
പരാതികള്‍ക്ക് അതിവേഗം പരിഹാരം കാണാനുള്ള സര്‍ക്കാര്‍ സംവിധാനമാണ് ‘CM WITH ME’ എന്നും, അടിയന്തര വിഷയങ്ങളില്‍ ഉന്നത ഉദ്യോഗസ്ഥര്‍ ഉടനടി ഇടപെടുന്നുണ്ടെന്നും കോള്‍ സെന്റര്‍ ജീവനക്കാര്‍ ജനങ്ങളെ അറിയിച്ചു. മലയാളത്തിലാണ് കൂടുതല്‍ കോളുകള്‍ ലഭിച്ചതെങ്കിലും ഇംഗ്ലീഷ്, തമിഴ്, ഹിന്ദി തുടങ്ങിയ ഭാഷകളിലും അന്വേഷണങ്ങള്‍ എത്തി.
ജനകീയ വിഷയങ്ങളില്‍ കാലതാമസമില്ലാതെ പരിഹാരം ഉറപ്പാക്കുക എന്ന ലക്ഷ്യത്തോടെ തുടങ്ങി യസംരംഭം, അതിന്റെ ആദ്യ ദിനം തന്നെ വലിയ വിജയമാണ് നേടിയത്. എല്ലാ അന്വേഷണങ്ങള്‍ക്കും മറുപടി നല്‍കാനുള്ള നടപടികള്‍ക്ക് ഉദ്യോഗസ്ഥര്‍ക്ക് നിര്‍ദ്ദേശം നല്‍കിയിട്ടുണ്ട്.