4 വര്‍ഷമായി സഹപ്രവര്‍ത്തകയുമായി ബന്ധം, തടസമായതോടെ ഭാര്യയെയും മക്കളെയും കൊന്നു, വനംവകുപ്പ് ഉദ്യോഗസ്ഥന് അറസ്റ്റില്‍
ഗുജറാത്തിലെ ഭാവ്നഗറില്‍ ഭാര്യയെയും രണ്ട് മക്കളെയും കൊലപ്പെടുത്തിയ കേസില്‍ വനംവകുപ്പ് ഉദ്യോഗസ്ഥന് അറസ്റ്റിലായി. ശൈലേഷ് ഖംഭ്ള (40) ആണ് അറസ്റ്റിലായത്. ഭാര്യ നയന ഖംഭ്ള (42), മകന്‍ ഭവ്യ, പ്രിഥ്വ (13) എന്നിവരാണ് കൊല്ലപ്പെട്ടത്. നാല് വര്‍ഷമായി സഹപ്രവര്‍ത്തകയുമായി ഉദ്യോഗസ്ഥന് ബന്ധമുണ്ടായിരുന്നെന്നും, ഈ ബന്ധത്തിന് ഭാര്യ തടസ്സമായതാണ് കൊലപാതകത്തിന് കാരണമെന്നുമാണ് പോലീസ് കണ്ടെത്തല്‍.
തനിക്ക് സഹപ്രവര്‍ത്തകയുമായി നാല് വര്‍ഷമായി ബന്ധമുണ്ടായിരുന്നുവെന്ന് ശൈലേഷ് സമ്മതിച്ചുവെന്ന് പൊലീസ് പറയുന്നു. സൂറത്തില്‍ മാതാപിതാക്കള്‍ക്കൊപ്പം കഴിഞ്ഞിരുന്ന ഭാര്യ നയന, ഭാവ്നഗറില്‍ തനിക്കൊപ്പം സ്ഥിരമായി താമസിക്കാന്‍ നിര്‍ബന്ധം പിടിച്ചതോടെയാണ് പ്രശ്‌നങ്ങള്‍ തുടങ്ങിയത്. ഇത് സഹപ്രവര്‍ത്തകയുമായുള്ള ബന്ധത്തിന് തടസ്സമാകുമെന്ന് മനസ്സിലാക്കിയ ശൈലേഷ്, കൊലപാതകം ആസൂത്രണം ചെയ്യുകയായിരുന്നു.
നവംബര്‍ 5-ന് രാത്രി ഇരുവരും തമ്മില്‍ വഴക്കുണ്ടായതിനെ തുടര്‍ന്ന്, നയനയെ സ്വീകരണമുറിയിലെ സോഫയില്‍ വെച്ച് ശ്വാസം മുട്ടിച്ച് കൊലപ്പെടുത്തി. ഇതിനുശേഷം, ഉറങ്ങുകയായിരുന്ന മക്കളെയും തലയിണ ഉപയോഗിച്ച് ശ്വാസം മുട്ടിച്ച് കൊലപ്പെടുത്തുകയായിരുന്നു.
കൊലപാതക ശേഷം, മൃതദേഹങ്ങള്‍ ഭാവ്നഗറിലെ തന്റെ ഔദ്യോഗിക വസതിക്ക് സമീപം മുന്‍കൂട്ടി കുഴിച്ചുവെച്ച ആറടി താഴ്ചയുള്ള കുഴിയില്‍ ഇട്ട് മൂടി. കൊലപാതകം ആസൂത്രിതമായിരുന്നുവെന്ന് തെളിയിക്കുന്ന വിവരങ്ങള്‍ അന്വേഷണത്തില്‍ പുറത്തുവന്നു. നവംബര്‍ 2-ന് തന്നെ ഔദ്യോഗിക ജീവനക്കാരെ ഉപയോഗിച്ച് ഇയാള്‍ കുഴി എടുപ്പിച്ചത് കൊലപാതകത്തിനുള്ള തയ്യാറെടുപ്പായിരുന്നു.
നവംബര്‍ 7-ന്, ഭാര്യയെയും മക്കളെയും കാണാനില്ലെന്ന് പറഞ്ഞ് ശൈലേഷ് തന്നെ പോലീസില്‍ വ്യാജ പരാതി നല്‍കി അന്വേഷകരെ തെറ്റിദ്ധരിപ്പിക്കാന്‍ ശ്രമിച്ചു. എന്നാല്‍, സിസിടിവി ദൃശ്യങ്ങളും നയനയുടെ ഫോണ്‍ ലൊക്കേഷനും പരിശോധിച്ച് നടത്തിയ വിശദമായ അന്വേഷണത്തില്‍, വനം വകുപ്പ് ക്വാര്‍ട്ടേഴ്‌സിനടുത്തുള്ള കുഴിയില്‍ നിന്ന് മൃതദേഹങ്ങള്‍ കണ്ടെത്തുകയായിരുന്നു. ഇതോടെയാണ് ശൈലേഷ് കുറ്റം സമ്മതിച്ചത്.