മുകളിലൊരു നിലയുണ്ട് പക്ഷെ കയറാന്‍ വഴിയില്ല; ഇത് കാളികാവ് സ്കൂളിലെ വിചിത്ര നിര്‍മിതി
മലപ്പുറം: കാളികാവ് മാളിയേക്കൽ ജിയുപി സ്കൂളിന് ഒന്നാം നില കെട്ടിടം നിർമ്മിച്ചത് കോണിപ്പടി ഇല്ലാതെ. പ്രീ പ്രൈമറി കെട്ടിടത്തിന് മുകളിൽ അടുത്തിടെ നിർമ്മിച്ച രണ്ട് ക്ലാസ്സ് മുറികളിലേക്ക് കയറാനാണ് കോണിപ്പടി ഇല്ലാത്തത്. നാട്ടുകാരുടെ വിഹിതവും പഞ്ചായത്ത് ഫണ്ട് ഉപയോഗിച്ചാണ് പുതിയ ക്ലാസ് റൂമുകൾ നിർമിച്ചത്.
കോണിപ്പടി നിർമ്മിക്കാതെ വന്നതോടെ ക്ലാസ്സ് മുറികൾ ഉപയോഗിക്കാൻ കഴിയാത്ത സാഹചര്യമാണ് നിലവിലുള്ളത്. നിലവിൽ സ്കൂളിലെ ബാത്റൂമിന്റെ ടെറസിലൂടെ ചാടി വേണം ഈ ക്ലാസ്സ് മുറികളിലേക്ക് കയറാൻ. അതേസമയം എസ്റ്റിമേറ്റിൽ കോണിപ്പടികൾ നിർമ്മാണം ഇല്ല എന്നാണ് കരാറുകാരന്റെ വാദം. കെട്ടിടത്തിന് കോണിപ്പടി ഇല്ലാതെ എങ്ങനെയാണ് കുട്ടികൾ ക്ലാസ്സ് മുറികളിലേക്ക് കയറുന്നത് എന്നാണ് ഇപ്പോൾ നാട്ടുകാരുടെയും രക്ഷിതാക്കളുടെയും പ്രധാന ചോദ്യം.
സംഭവം വാര്‍ത്തയായതോടെ വലിയ വിവാദങ്ങളും ചൂടന്‍ ചര്‍ച്ചകളുമാണ് ഇതുമായി ബന്ധപ്പെട്ട് ഉയരുന്നത്. കെട്ടിടത്തിന്റെ നിർമാണത്തിലെ അശാസ്ത്രീയത പരിഹരിക്കുന്നതിനും ക്ലാസ് റൂമുകൾ ഉപയോഗിക്കുന്നതിനുമായി വാർഡ് അംഗം സിഎച്ച് നാസർ എന്ന ബാപ്പു ഒരു വർഷമായി ഭരണസമിതിയിൽ ആവശ്യങ്ങൾ ഉന്നയിക്കുന്നുണ്ട്. എന്നാൽ ഇതുവരെ അധികൃതരുടെ ഭാഗത്തുനിന്ന് ഇതിനൊരു പരിഹാരം കണ്ടെത്താൻ സാധിച്ചിട്ടില്ല.
നാട്ടുകാർക്ക് പലർക്കും കെട്ടിട നിർമ്മാണം പൂർത്തിയായത് അറിയില്ല. നാട്ടുകാർ പിരിച്ചെടുത്തത് ഉൾപ്പടെ ഒൻപതു ലക്ഷം രൂപ ചിലവഴിച്ചാണ് സ്കൂളിന്റെ കെട്ടിട നിർമ്മാണം പൂർത്തിയാക്കിയത്. ഏറെ പണിപ്പെട്ട് നിര്‍മിച്ചൊരു കെട്ടിടമാണ് ഇത്തരത്തില്‍ ഉപയോഗ ശൂന്യമായി കിടക്കുന്നത്.