കേരളബാങ്ക്,ജില്ലാ സഹകരണ ബാങ്ക് ജീവനക്കാര്‍ പണിമുടക്കി
മലപ്പുറം :കേരള ബാങ്ക് എംപ്ലോയീസ് കോണ്‍ഗ്രസിന്റെ നേതൃത്വത്തില്‍ കേരള ബാങ്കിലെയും ജില്ലാ സഹകരണ ബാങ്കിലെയും ജീവനക്കാര്‍ സംയുക്തമായി പണിമുടക്കി. മലപ്പുറത്ത് പ്രതിഷേധ പ്രകടനവും പൊതുയോഗവും നടത്തി.
കഴിഞ്ഞ വര്‍ഷം ഉത്തരവായ കേരള ബാങ്കിലെയും മലപ്പുറം ജില്ലാ സഹകരണ ബാങ്കിലെയും ശമ്പള പരിഷ്‌കരണത്തിലെ അപാകതകള്‍ പരിഹരിക്കുക, ഫിറ്റ്‌മെന്റ് ഫോര്‍മുലക്ക് വിരുദ്ധമായി ശമ്പള സ്‌കയിലുകളും ഇന്‍ക്രിമെന്റുകളും വെട്ടിച്ചുരുക്കിയ നടപടി തിരുത്തുക തുടങ്ങിയ ആവശ്യങ്ങളുന്നയിച്ചായിരുന്നു പണിമുടക്ക്.
ജില്ലാ സഹകരണ ബാങ്ക് ഹെഡ്ഓഫീസിന് മുന്നില്‍ നടന്ന പ്രതിഷേധ പൊതുയോഗതില്‍ എം ഡി സി ബാങ്ക് എംപ്ലോയീസ് യൂണിയന്‍ പ്രസിഡന്റ് എ കെ അബ്ദുറഹിമാന്‍, ജനറല്‍ സെക്രട്ടറി പി കെ മൂസക്കുട്ടി, ഒ പി സമീറലി, ഗിരീഷ് ബാബു തടത്തില്‍ എന്നിവര്‍ പ്രസംഗിച്ചു. ടി രാധാകൃഷ്ണന്‍, പി മുഹമ്മദ് ഷാഫി, കെ യേശുദാസ്,എം കെ പ്രിയ ,എം പി റഹ്മത്ത് എന്നിവര്‍ പ്രകടനത്തിന് നേതൃത്വം നല്‍കി.മിനിമം ബെനിഫിറ്റ് ഉറപ്പാക്കുക കേരളബാങ്കില്‍ രണ്ടു വര്‍ഷമായി തടഞ്ഞു വെച്ച പ്രമോഷനുകള്‍ അനുവദിക്കുക,ട്രാന്‍സ്ഫര്‍ പോളിസി നടപ്പാക്കുക തുടങ്ങിയ കാര്യങ്ങളും ജീവനക്കാര്‍ ആവശ്യപ്പെടുന്നു.
കേരള ബാങ്കിലെയും മലപ്പുറം ജില്ലാ ബാങ്കിലെയും ജീവനക്കാര്‍ സംസ്ഥാന വ്യാപകമായി നടത്തിയ പണിമുടക്കിന്റെ ഭാഗമായിയുന്നു സമര പരിപാടികള്‍.