സൂപ്പർമാർക്കറ്റിൽ യുവതിക്ക് ക്രൂരമർദ്ദനം; അക്രമി സഹപ്രവർത്തകയുടെ ഭർത്താവ്

കൊച്ചി: തൃപ്പൂണിത്തുറയിൽ യുവതിക്ക് നേരെ ക്രൂര മർദ്ദനം. സൂപ്പർമാർക്കറ്റ് ജീവനക്കാരിക്ക് നേരെയാണ് ആക്രമണമുണ്ടായത്. സഹപ്രവർത്തകയുടെ ഭർത്താവാണ് മർദ്ദിച്ചതെന്ന് യുവതി നൽകിയ പരാതിയിൽ പറയുന്നു. സംഭവത്തിന്റെ സിസിടിവി ദൃശ്യങ്ങൾ വൈറലാണ്. പരാതി നൽകിയിട്ടും കേസെടുക്കുന്നതിൽ പോലീസിന് വീഴ്ച സംഭവിച്ചുവെന്നാണ് ആരോപണം.

പുതിയകാവ് സ്വദേശി ഷിജിക്കാണ് ആക്രമണത്തിൽ പരിക്കേറ്റത്. പ്രതി സതീഷ് ഒളിവിലാണ്. സംഭവത്തിൽ പരാതിയുമായി പോലീസിനെ സമീപിച്ചപ്പോൾ കേസ് വേണമോയെന്ന് പോലീസ് ചോദിച്ചതായി ഷിജി ആരോപിച്ചു. ചൊവ്വാഴ്ച ഉച്ചയോടെയാണ് കേസിനാസ്പദമായ സംഭവം നടന്നത്. ആക്രമണത്തിൽ ഷിജിയുടെ കൈ ഒടിയുകയും തലയ്‌ക്ക് പരിക്കേൽക്കുകയും ചെയ്തിട്ടുണ്ട്. പ്രതിയെ ആദ്യമായി കാണുന്നത് ആക്രമണം നടന്ന സമയത്താണെന്ന് ഷിജി വ്യക്തമാക്കി. പ്രതിക്ക് മുൻവൈരാഗ്യമില്ലെന്നാണ് നിഗമനം.