മീഡിയവണ് വിലക്ക് തുടരും; അപ്പീല് ഹൈക്കോടതി തളളി
കൊച്ചി: മീഡിയവണ് ചാനലിനെതിരേയുളള കേന്ദ്ര സർക്കാർ വിലക്ക് തുടരും. വിലക്ക് ഏര്പ്പെടുത്തിയതിനെതിരെ ചാനല് നല്കിയ അപ്പീല് ഹൈക്കോടതി ചീഫ് ജസ്റ്റിസ് അധ്യക്ഷനായ ഡിവിഷന് ബെഞ്ച് തളളി. സിംഗിള് ബെഞ്ച് ഉത്തരവ് ഡിവിഷന് ബെഞ്ചും ശരിവെക്കുകയായിരുന്നു.
ചാനല് ഉടമകളായ മാധ്യമം ബ്രോഡ്കാസ്റ്റിംഗ് ലിമിറ്റഡും ചാനല് എഡിറ്റര് പ്രമോദ് രാമനും കേരള പത്രപ്രവര്ത്തക യൂണിയനുമാണ് അപ്പീല് നല്കിയിരുന്നത്. ചീഫ് ജസ്റ്റിസ് എസ് മണികുമാര്, ജസ്റ്റിസ് ഷാജി പി ചാലി എന്നിവരുടെ ബെഞ്ചാണ് കേസില് വിധി പറഞ്ഞത്. ചാനലിനുവേണ്ടി മുതിര്ന്ന അഭിഭാഷകന് ദുഷ്യന്ത് ദവെയായിരുന്നു ഹാജരായത്. ഭരണഘടനാപരമായ പ്രശ്നമാണ് മീഡിയവണ് ഉന്നയിച്ചതെന്ന് ദുഷ്യന്ത് ദവെ വാദിച്ചു. കേന്ദ്ര സര്ക്കാറിന് വേണ്ടി അഡീഷനല് സോളിസിറ്റര് ജനറല് അമാന് ലേഖി ഹാജരായി.
സംപ്രേഷണം വിലക്കിയ കേന്ദ്രസര്ക്കാര് ഉത്തരവിനെതിരെ ചാനല് സിംഗിള് ബെഞ്ചിനെ സമീപിച്ചിരുന്നു. ഈ ഹര്ജി തള്ളിയതിനെതിരെ ഡിവിഷന് ബെഞ്ചില് റിട്ട് ഹര്ജി സമര്പ്പിച്ചത്. ഈ റിട്ട് ഹര്ജിയിലാണ് ഇപ്പോൾ വിധി വന്നിരിക്കുന്നത്. ഹൈക്കോടതി വിധിക്കെതിരെ സുപ്രീംകോടതിയെ സമീപിക്കുമെന്നാണ് ചാനല് ഉടമകള് അറിയിച്ചു. ജനുവരി 31നാണ് ചാനലിന്റെ പ്രവർത്തനാനുമതി വിലക്കികൊണ്ടുളള ഉത്തരവ് വന്നത്.