ലെന്‍സ്‌ഫെഡ് കാപ്പിറ്റല്‍ ഉദ്ഘാടനം ഞായറാഴ്ച
ഇ
മലപ്പുറം;ലൈസന്‍സ്ഡ് എഞ്ചിനീയേഴ്‌സ് ആന്റ് സൂപ്പര്‍വൈസേഴ്‌സ് ഫെഡറേഷന്‍ (ലെന്‍സ്‌ഫെഡ്) ജില്ലാ കമ്മിറ്റിയുടെ ആസ്ഥാന മന്ദിരം (ലെന്‍സ്‌ഫെഡ് കാപ്പിറ്റല്‍) ഇന്ന് വൈകുന്നരം മൂന്ന് മണിക്ക് പി ഉബൈദുള്ള എം എല്‍ എ ഉദ്ഘാടനം ചെയ്യുമെന്ന് ജില്ലാ കമ്മറ്റി ഭാരവാഹികള്‍ മലപ്പുറത്ത് വാര്‍ത്താ സമ്മേളനത്തില്‍ അറിയിച്ചു.
മലപ്പുറം കാവുങ്ങല്‍ ബൈപാസില്‍ 5.27 സെന്റ് സ്ഥലത്ത് 1500 ചതുരശ്ര അടി വിസ്തീര്‍ണ്ണത്തിലാണ് കെട്ടിടം നിര്‍മ്മിച്ചത്. ആധുനിക സൗകര്യത്തോടു കൂടിയ മീറ്റിംഗ് ഹാള്‍, മിനി കോണ്‍ഫറന്‍സ് ഹാള്‍, ഓഫീസ് റൂം, ടോയ്‌ലറ്റ്, അംഗ പരിമിതിയുള്ളവര്‍ക്കുള്ള പ്രത്യേക ടോയ്‌ലറ്റ് എന്നിവ ഇവിടെ സജ്ജീകരിച്ചിട്ടുണ്ട്. സ്ഥലമുള്‍പ്പെടെ 60,00,000/ (അറുപത് ലക്ഷം) രൂപ ചെലവിട്ടാണ് കെട്ടിടം പണി പൂര്‍ത്തീകരിച്ചത്.കഴിഞ്ഞ വര്‍ഷം നവംബര്‍ 25 ന് സംസ്ഥാന പി ആര്‍ ഒ ഡോ യു എ ഷബീര്‍ ശിലാസ്ഥാപനം നിര്‍വ്വഹിച്ച കെട്ടിടം 100 ദിവസത്തിനുള്ളില്‍ പൂര്‍ത്തീകരിക്കാന്‍ കഴിഞ്ഞതായി അവര്‍ പറഞ്ഞു.
മലപ്പുറം മുന്‍സിപ്പല്‍ ചെയര്‍മാന്‍ മുജീബ്കാടേരി, സംസ്ഥാന ജില്ലാ നേതാക്കള്‍, മറ്റു സാമൂഹിക രാഷ്ട്രീയ നേതാക്കള്‍ എന്നിവര്‍ ചടങ്ങില്‍ സംബന്ധിക്കും. കാരുണ്യ പ്രവര്‍ത്തന രംഗത്ത് പ്രവര്‍ത്തിക്കുന്ന സംഘടനകള്‍ക്ക് യോഗം ചേരുന്നതിനും മററും ഹാള്‍ സൗജന്യമായി നല്‍കും. വാര്‍ത്താ സമ്മേളനത്തില്‍ ജില്ലാ പ്രസിഡണ്ട് കെ അഷറഫ്, സെക്രട്ടറി കെ.ബി.സജി, ട്രഷറര്‍ ഷിബു കരിയക്കോട്ടില്‍,സംസ്ഥാന പി ആര്‍ ഒ ഡോ. യു. എ. ഷബീര്‍, സംസ്ഥാന സമിതി അംഗം ബാബു എടയൂര്‍ എന്നിവര്‍ പങ്കെടുത്തു.