മാനഹാനി ഉണ്ടാക്കുന്ന തരത്തില്‍ യുവതിയുടെ ഫോട്ടോ പ്രചരിപ്പിച്ചു; അഭിഭാഷകനെ കോട്ടക്കൽ പോലീസ് അറസ്റ്റ് ചെയ്തു
മലപ്പുറം: മാനഹാനി ഉണ്ടാക്കുന്ന തരത്തില്‍ സമൂഹമാധ്യമങ്ങളില്‍ യുവതിയുടെ ഫോട്ടോ പ്രചരിപ്പിച്ചെന്ന പരാതിയില്‍ അഡ്വ. ജഹാംഗീര്‍ ആമിന റസാഖിനെ കോട്ടക്കല്‍ പോലീസ് അറസ്റ്റ് ചെയ്തു. യുവതിയുടെ പരാതിയില്‍ അറസ്റ്റ് രേഖപ്പെടുത്തിയത്. ഐടി ആക്ട് പ്രകാരമാണ് കേസ്. മലപ്പുറം സിജെഎം കോടതിയില്‍ ഹാജരാക്കിയ ഇയാള്‍ക്ക് ഇടക്കാല ജാമ്യം ലഭിച്ചു. സാമൂഹ്യമാധ്യമങ്ങളില്‍ സജീവമായ അഭിഭാഷകന്‍ കൂടിയായ ജഹാംഗീര്‍ ആമിന റസാഖ് വിവിധ അച്ചടി, ഓണ്‍ലൈന്‍ മാധ്യമങ്ങളില്‍ കോളങ്ങളും എഴുതാറുണ്ടായിരുന്നു. പ്രമാദമായ പലകേസുകളിലും നിലപാടുകള്‍ പറഞ്ഞും ഇയാൾ ശ്രദ്ധനേടിയിട്ടുണ്ട്. ഇയാൾക്കെതിരെയുള്ള ആരോപണത്തെ കുറിച്ചു കഴിഞ്ഞ ദിവസങ്ങളില്‍തന്നെ സോഷ്യല്‍ മീഡിയയില്‍ ചര്‍ച്ചകള്‍ നടന്നിരുന്നു. ഇതിനിടയിലാണ് അറസ്റ്റ് രേഖപ്പെടുത്തിയത്.
വിദ്യാർഥിനിയുമായി പ്രണയം
നേരത്തെ ഒരു മാധ്യമത്തിലൂടെയാണ് വീട്ടമ്മ ജഹാംഗീറിനെതിരെ ആരോപണം ഉന്നയിച്ചത്. ഇത് സംബന്ധിച്ച് ഏലത്തൂര്‍ പൊലീസ് സ്റ്റേഷനില്‍ പരാതിയും നല്‍കുകയും ചെയ്തിരുന്നു. എന്നാല്‍ സംഭവം നടന്നത് നടക്കാവ് പൊലീസ് സ്റ്റേഷന്‍ പരിധിയിലായതിനാല്‍ ഏലത്തൂരില്‍ കേസെടുക്കേണ്ടതില്ല എന്ന നിലപാടിലായിരുന്നു ഏലത്തൂര്‍ പൊലീസ്. പതിനാറ് വര്‍ഷം മുമ്പ് അഡ്വ. ജഹാംഗീര്‍ നിയമ വിദ്യാര്‍ത്ഥിയായിരിക്കെ ഒരു ട്യൂഷന്‍ സെന്ററില്‍ അദ്ധ്യാപകനായും ജോലി നോക്കിയിരുന്നു. ആ ട്യൂഷന്‍ സെന്ററിലെ ഡിഗ്രി വിദ്യാര്‍ത്ഥിയായിരുന്നു യുവതി. തന്റെ വിദ്യാര്‍ഥിനിയായിരുന്ന യുവതിയോട് അക്കാലത്ത് ജഹാംഗീര്‍ പ്രണയം പറഞ്ഞെന്നും എന്നാല്‍ വിവാഹത്തിന്റെ വക്കില്‍ വരെയെത്തിയ ബന്ധത്തില്‍ നിന്നും ജഹാംഗീര്‍ കാരണമില്ലാതെ പിന്മാറിയെന്നുമായിരുന്നു യുവതി ആരോപിച്ചിരുന്നത്.
2018ൽ വീണ്ടും കണ്ടു
അതിന് ശേഷം വര്‍ഷങ്ങള്‍ കഴിഞ്ഞ് 2018 ലാണ് ജഹാംഗീര്‍ വീണ്ടും യുവതിയെ കാണുന്നത്. വിവാഹിതയായിരുന്ന യുവതി അന്ന് ഭര്‍ത്താവുമായി പിണങ്ങി നില്‍ക്കുകയായിരുന്നു. യുവതിയോട് അടുത്ത ജഹാംഗീര്‍ മുമ്പ് യുവതിയെ ഉപേക്ഷിച്ചതില്‍ കുറ്റബോധമുണ്ടെന്നും ഭര്‍ത്താവിനെ ഡിവോഴ്‌സ് ചെയ്ത് വന്നാല്‍ കല്യാണം കഴിച്ചോളാമെന്നും വിശ്വസിപ്പിച്ചു. ജഹാംഗീറും ഡിവോഴ്‌സ് കഴിഞ്ഞ് നില്‍ക്കുകയാണെന്നാണ് അന്ന് യുവതിയോട് പറഞ്ഞതെന്നും യുവതി പരാതിയില്‍ പറഞ്ഞു.
’വിവാഹവാഗ്ദാനം നൽകി ശാരീരിക ബന്ധം’
തുടര്‍ന്ന് യുവതിയുമായി ബന്ധം സ്ഥാപിക്കുകയും. വിവാഹവാഗ്ദാനം നല്‍കി ശാരീരികബന്ധത്തിലേര്‍പ്പെട്ടിരുന്ന ജഹാംഗീര്‍ മൊബൈലില്‍ നഗ്നചിത്രങ്ങള്‍ പകര്‍ത്തിയെന്നും യുവതി പറയുന്നു. ഇതിനെ പറ്റി യുവതി ചോദിച്ചിട്ടും ജഹാംഗീര്‍ മറുപടി പറഞ്ഞില്ല. എന്നാല്‍ പിന്നീട് വിവാഹത്തിന്റെ കാര്യം യുവതി ചോദിക്കാന്‍ തുടങ്ങിയപ്പോള്‍ ജഹാംഗീര്‍ ഫോണ്‍ എടുക്കാതായെന്നുമാണ് യുവതി ആരോപിക്കുന്നത്. താന്‍ വീണ്ടും ചതിക്കപ്പെടുകയാണോ എന്ന് യുവതി സംശയിച്ചുതുടങ്ങുന്നത് അപ്പോഴാണ്.
ചിത്രങ്ങൾ പ്രചരിച്ചു
ചിത്രങ്ങള്‍ പുറത്ത് പ്രചരിക്കപ്പെട്ടപ്പോഴാണ് താന്‍ കബളിപ്പിക്കപ്പെട്ട കാര്യം യുവതി തിരിച്ചറിഞ്ഞത്. താന്‍ മാത്രമല്ല, മറ്റ് മുപ്പതോളം സ്ത്രീകളും ഇയാളുടെ ചതിയില്‍ വീണുപോയിട്ടുണ്ടെന്നും യുവതി ആരോപിക്കുന്നു. തന്നെ ചതിച്ചാണ് ശാരീരികബന്ധത്തിലേര്‍പ്പെട്ടതെന്ന് മനസിലായതോടെയാണ് യുവതി പരാതിയുമായി പോലീസിനെ സമീപിച്ചത്. സാമൂഹ്യമാധ്യമങ്ങളില്‍ സജീവമായ അഡ്വ. ജഹാംഗീര്‍ ആമിനാ റസാഖ് സിപിഎം അനുകൂല സൈബര്‍ പോരാട്ടങ്ങളിലൂടെയാണ് ശ്രദ്ധേയനായത്. ത്.യൂത്ത് കോണ്‍ഗ്രസ് നേതാവ് വീണ എസ് നായര്‍ക്കെതിരെ രണ്ട് വര്‍ഷം മുമ്പ് മുഖ്യമന്ത്രിയെ അധിക്ഷേപിച്ചെന്ന കേസ് എറണാകുളം പൊലീസ് കേസ് രജിസ്റ്റര്‍ ചെയ്തത് ഇയാളുടെ പരാതിയിന്മേലാണ്.