സിപിഎം നേതാവ് പീഡിപ്പിച്ചെന്ന് സിപിഐ വനിതാ നേതാവ്; പൊലീസ് കേസെടുത്തു
കോഴിക്കോട്: സിപിഎം പേരാമ്പ്ര ഏരിയ കമ്മിറ്റി അംഗത്തിനെതിരെ പീഡന പരാതിയിൽ കേസ്. പേരാമ്പ്ര ഏരിയ കമ്മിറ്റി അംഗവും ചെറുവണ്ണൂർ പഞ്ചായത്ത് അംഗവുമായ കെ പി ബിജുവിനെതിരെയാണ് കേസ്. പഞ്ചായത്ത് ഓഫീസിൽ വെച്ച് പീഡിപ്പിക്കാൻ ശ്രമിച്ചെന്ന സി പി ഐ വനിതാ നേതാവിന്റെ പരാതിയിൽ മേപ്പയ്യൂർ പൊലീസാണ് കേസെടുത്തത്.
ഒരാഴ്ച മുൻപാണ് കേസിന് ആസ്പദമായ സംഭവം. ചെറുവണ്ണൂർ പഞ്ചായത്ത് ഓഫീസിലെത്തിയ സി പി ഐ നേതാവായ യുവതിയെ ഒൻപതാം വാർഡ് അംഗം കെ പി ബിജു കയറിപ്പിടിച്ചെന്നും പീഡിപ്പിക്കാൻ ശ്രമിച്ചെന്നും പരാതിയിൽ പറയുന്നു. ചെറുവണ്ണൂർ മുന്‍ പഞ്ചായത്ത് പ്രസിഡന്റും ഒമ്പതാംവാർഡ് മെമ്പറുമായ ബിജു സിപിഎം പേരാമ്പ്ര ഏരിയ കമ്മിറ്റി അംഗമാണ്.
കഴിഞ്ഞ ദിവസമാണ് യുവതി മേപ്പയൂർ പൊലീസിൽ രേഖാമൂലം പരാതി നൽകിയത്. യുവതിയുടെ മൊഴി രേഖപ്പെടുത്തിയ പൊലീസ് എഫ് ഐ ആർ രജിസ്റ്റർ ചെയ്തു കേസെടുത്തു. പ്രതി ഒളിവിലാണെന്നും ഉടൻ അറസ്റ്റ് ഉണ്ടാവുമെന്നും പൊലീസ് പറയുന്നു.
പീഡനപരാതിയിൽ പ്രതിയായ ബിജു മെമ്പർ സ്ഥാനം രാജിവെക്കണമെന്നാവശ്യപ്പെട്ട് ചെറുവണ്ണൂരിൽ സി പി ഐ പോസ്റ്ററുകൾ പതിച്ചിട്ടുണ്ട്. പരാതിയെക്കുറിച്ച് അന്വേഷിക്കാൻ സിപിഎം പേരാമ്പ്ര ഏരിയ കമ്മിറ്റി രണ്ടംഗ കമ്മീഷനെ നിയോഗിച്ചു. കമ്മീഷന്റെ റിപ്പോർട്ട് ലഭിച്ചതിന് ശേഷമാവും പാർട്ടി നടപടികൾ.