വിദ്യാര്‍ഥിനിയെ എസ്.എഫ്.ഐ പ്രവര്‍ത്തക‍ര്‍ മര്‍ദിച്ച സംഭവം; അന്വേഷണ ഉദ്യോഗസ്ഥനെ മാറ്റി
പത്തനംതിട്ട : കടമ്മനിട്ടയില്‍ വിദ്യാര്‍ഥിനിക്ക് എസ്.എഫ്.ഐ പ്രവര്‍ത്തകരുടെ മര്‍ദനമേറ്റ സംഭവം അന്വേഷിക്കുന്ന ഉദ്യോഗസ്ഥനെ മാറ്റി.
വിവാദമായ ഈ സംഭവത്തില്‍ ആറൻമുള സി. ഐ. മനോജിനെ ആദ്യം അന്വേഷണ ചുമതല നല്‍കിയത്. മനോജിനെ അന്വേഷമ ചുമതലയില്‍നിന്ന് മാറ്റി. പകരം ചുമതല പത്തനംതിട്ട ഡി.വൈ.എസ്.പി നന്ദകുമാറിന് കൈമാറി.
പരാതിക്കാരിക്കെതിരെ പൊലീസ് തുടര്‍ച്ചയായി കേസുകളെടുത്തത് വിവാദമായിരുന്നു. സി.പി.എം സമ്മര്‍ദത്തിന് വഴങ്ങിയാണ് പൊലീസ് കേസെടുത്തതെന്ന ആക്ഷേപം പ്രതിപക്ഷം ഉന്നയിച്ചിരുന്നു. ഇതിന് പിന്നാലെയാണ് ഉദ്യോഗസ്ഥനെ മാറ്റിയത്. എന്നാല്‍, പട്ടിക ജാതി-വര്‍ഗ പീഡനം നിരോധന നിയമം ഉള്‍പ്പെടെ ചുമത്തിയ കേസുകളില്‍ ഡി.വൈ.എസ്.പി തന്നെ അന്വേഷണം നടത്തണമെന്നും, അതിനാലാണ് സി.ഐ യില്‍ നിന്ന് അന്വേഷണ ചുമതല മാറ്റിയതെന്നുമാണ് ഔദ്യോഗിക വിശദീകരണം.
സഹപാഠിയായ വിദ്യാര്‍ഥിയെ ജാതിപ്പേര് വിളിച്ചു എന്ന പരാതിയിലാണ് പട്ടികജാതി പട്ടികവര്‍ഗ സംരക്ഷണ നിയമപ്രകാരം കേസ് എടുത്തത്. പരാതിക്കാരിയായ പെണ്‍കുട്ടിയും സുഹൃത്തുമാണ് ഇതിലെ പ്രതികള്‍. ഇതോടെ മൂന്ന് കേസിലാണ് മര്‍ദനമേറ്റ പെണ്‍കുട്ടിയെ പൊലീസ് പെടുത്തിയത്. എസ്‌എഫ്‌ഐക്കാരാണ് രണ്ട് പരാതിക്കാരും. എസ്.എഫ്.ഐ. നേതാവ് ജെയ്സണ്‍ ആക്രമിച്ചു എന്ന പരാതിയില്‍ മൂന്നു ദിവസത്തിന് ശേഷമാണ് പൊലീസ് കേസെടുത്തത്. പക്ഷെ മണിക്കൂറുകള്‍ക്കകം പരാതിക്കാരിക്ക് എതിരെ പൊലീസ് കേസെടുത്തുവെന്നതും വിവാദമായിരുന്നു.