പൈതങ്ങള്‍ ജാറം ഉറൂസ് മുബാറക്കിന് തുടക്കമായി ; സയ്യിദ് അലി ബാഫഖി തങ്ങള്‍ കൊയിലാണ്ടി പതാക ഉയര്‍ത്തി
മൂന്ന് ദിവസങ്ങളിലായി നടക്കുന്ന പൊന്മുണ്ടം ചോലപ്പുറം പൈതങ്ങള്‍ ജാറം ഉറൂസ് മുബാറക്കിന് തുടക്കമായി. ജാറം കേന്ദ്രീകരിച്ച് എല്ലാ മാസവും നടത്തി വരുന്ന അസ്മാഉല്‍ ഹുസ്ന റാതീബ്(ആത്മീയ സംഗമം)ന്റെ ഇരുപത്തിയൊന്നാം വാര്‍ഷികവും ഉറൂസിന്റെ ഭാഗമായി നടക്കും.
വെള്ളിയാഴ്ച വൈകുന്നേരം 04 ന് സിയാറത്തോടെയാണ് ഉറൂസിന് തുടക്കം കുറിച്ചത്. തുടര്‍ന്ന് സ്വലാത്ത് റാലി നടന്നു. പൊന്മള അബ്ദുല്‍ ഖാദര്‍ മുസ്ലിയാര്‍ പരിപാടി ഉദ്ഘാടനം ചെയ്തു. ഷറഫുദ്ദീന്‍ സഖാഫി കുറ്റിപ്പുറം ഉല്‍ബോധന പ്രഭാഷണം നടത്തി. സയ്യിദ് ശറഫുദ്ദീന്‍ ബുഖാരി കാവുംപുറം സമാപന ദുആക്ക് നേതൃത്വം നല്‍കി. തുടര്‍ന്ന് ഫോക്ക് ലോര്‍ അക്കാദമി വൈസ് ചെയര്‍മാന്‍ ഡോ.കോയ കാപ്പാടും സംഘവും നേതൃത്വം നല്‍കിയ രിഫാഈ റാത്തീബ് മജ്‌ലിസ് നടന്നു .
രാവിലെ ആറ് മണിക്ക് നടന്ന മൗലിദ് പാരായണത്തോടെ രണ്ടാം ദിനത്തിലെ പരിപാടിക്ക് തുടക്കം കുറിച്ചു. തുടര്‍ന്ന് രാവിലെ 9:30ന് ചെമ്മാട് ഇമ്രാന്‍സ് കണ്ണാശുപത്രിയുടെ നേതൃത്വത്തില്‍ നടന്ന സൗജന്യ നേതൃ പരിശോധന ക്യാമ്പ് നടന്നു. പഞ്ചായത്ത് മെമ്പര്‍ ആര്‍. കോമുക്കുട്ടി ആശംസകളര്‍പ്പിച്ചു.
വൈകീട്ട് 4 ന് നടന്ന അസ്മാഉല്‍ ഹുസ്ന റത്തീബിന് സമസ്ത കേന്ദ്ര മുശാവറ അംഗം അബ്ദു മുസ്ലിയാര്‍ താനാളൂര്‍ നേതൃത്വം നല്‍കി. തുടര്‍ന്ന് ബുര്‍ദ & ഇശല്‍ മജ്ലിസും മുള്ളൂര്‍ക്കര മുഹമ്മദലി സഖാഫിയുടെ മത പ്രഭാഷണവും നടന്നു. സയ്യിദ് അബ്ദുറഹ്‌മാന്‍ ഇമ്പിച്ചിക്കോയ ബായാര്‍ തങ്ങള്‍ പ്രാര്‍ത്ഥനക്ക് നേതൃത്വം നല്‍കും.
സമാപന ദിവസമായ ഞായറാഴ്ച രാവില 6:00 മണിക്ക് ശാദുലി റാത്തീബ് നടക്കും. വൈകുന്നേരം 06:30 ന് നടക്കുന്ന സമാപന സമ്മേളനം
സയ്യിദ് സൈനുല്‍ ആബിദീന്‍ ജീലാനി മൂച്ചിക്കല്‍ തങ്ങളുടെ അധ്യക്ഷതയില്‍ സയ്യിദ് ജലാലുദ്ദീന്‍ ജീലാനി ഉദ്ഘാടനം ചെയ്യും. കേരള സംസ്ഥാന വഖഫ്, ഹജ്ജ്, കായിക വകുപ്പ് മന്ത്രി വി അബ്ദുറഹ്‌മാന്‍ മുഖ്യ അതിഥി ആയിരിക്കും. സയ്യിദ് പൂക്കോയ തങ്ങള്‍ ജിലാനി പൊന്മുണ്ടം ആമുഖ പ്രഭാഷണം നടത്തും. സയ്യിദ് മുത്തുക്കോയ തങ്ങള്‍ എളങ്കൂര്‍ പ്രാരംഭ പ്രാര്‍ത്ഥന നടത്തും. കൂറ്റമ്പാറ അബ്ദുറഹ്‌മാന്‍ ദാരിമി മുഖ്യപ്രഭാഷണം നടത്തും.
സയ്യിദ് സൈനുദ്ധീന്‍ സഖാഫി കൂരിക്കുഴി സമാപന പ്രാര്‍ത്ഥനക്ക് നേതൃത്വം നല്‍കും.സാദാത്തുക്കള്‍,മത, സാംസ്‌കാരിക, രാഷ്ട്രീയ രംഗത്തെ പ്രമുഖര്‍,പൗര പ്രധാനികള്‍ സംബന്ധിക്കും.
പരിപാടിയുടെ ഭാഗമായി റിലീഫ് വിതരണം,
മുഴുവന്‍ ദിവസവും അന്നദാനവും നടക്കും.