മമ്മൂട്ടി ഹിറ്റടിക്കുമോ ? ബജറ്റ് 27 കോടി, ഫുള്‍ ബ്ലാക് ആൻഡ് വൈറ്റ്, ‘ഭ്രമയുഗം’ 20ല്‍പരം വിദേശ രാജ്യങ്ങളില്‍
മമ്മൂട്ടി നായകനായി എത്തുന്ന ഏറ്റവും പുതിയ ചിത്രം ഭ്രമയുഗം റിലീസ് ചെയ്യാൻ ഇനി ഏഴ് ദിവസങ്ങള്‍ മാത്രം ബാക്കി.രാഹുല്‍ സദാശിവൻ സംവിധാനം ചെയ്യുന്ന ചിത്രം ഹൊറർ ത്രില്ലല്‍ ഗണത്തില്‍പ്പെടുന്ന ചിത്രമാണ്. ഇതുവരെ കാണാത്ത ലുക്കില്‍ നെഗറ്റീവ് ടച്ചില്‍ മമ്മൂട്ടി എത്തുന്നത് ബ്ലാക് ആൻഡ് വൈറ്റ് കോമ്ബോയില്‍ ആണെന്നത് ഏറെ ശ്രദ്ധേയമാണ്. ഈ അവസരത്തില്‍ ചിത്രത്തിന്റെ വിദേശ റിലീസ് സംബന്ധിച്ച വിവരങ്ങള്‍ പുറത്തുവരികയാണ്.
ഭ്രമയുഗം ഔദ്യോഗിക പേജില്‍ നിന്നുള്ള വിവരം പ്രകാരം 22ല്‍ അധികം രാജ്യങ്ങളിലാണ് ചിത്രം റിലീസ് ചെയ്യുന്നത്. യുണൈറ്റഡ് കിംഗ്ഡം, ജർമ്മനി, ജോർജിയ, ഫ്രാൻസ്, പോളണ്ട്, മാള്‍ട്ട, ഉസ്ബെക്കിസ്ഥാൻ, ഓസ്ട്രിയ, മോള്‍ഡോവ, ഇറ്റലി എന്നീ യുറോപ്പ് രാജ്യങ്ങളിലാണ് മമ്മൂട്ടി ചിത്രം റിലീസ് ചെയ്യുക. യുഎഇ, സൗദ് അറേബ്യ, ഒമാൻ, കുവൈറ്റ്, ഖത്തർ, ബഹ്റിൻ എന്നീ ജിസിസി രാജ്യങ്ങളിലും യുഎസ്‌എ, കാനഡ, ഓസ്ട്രേലിയ, ന്യൂസിലാന്റ് എന്നിവടങ്ങളിലും ഭ്രമയുഗം പ്രദർശനത്തിന് എത്തും.
കേരളത്തിലും മികച്ച സ്ക്രീൻ കൗണ്ട് ആകും മമ്മൂട്ടി ചിത്രത്തിന് ലഭിക്കുക. 300ല്‍പരം സ്ക്രീനുകളില്‍ ചിത്രം പ്രദർശിപ്പിക്കുമെന്നാണ് അനൗദ്യോഗിക വിവരം. ഫെബ്രുവരി 15നാണ് ചിത്രത്തിന്റെ റിലീസ്. മമ്മൂട്ടിക്കൊപ്പം അമാല്‍ഡ ലിസ്, മണികണ്ഠൻ ആചാരി, അർജുൻ അശോകൻ, സിദ്ധാർത്ഥ് ഭരതൻ എന്നിവരാണ് പ്രധാനവേഷത്തില്‍ എത്തുന്നത്. 27.73കോടിയാണ് ഭ്രമയുഗത്തിന്റെ ബജറ്റ് എന്നാണ് നിര്‍മ്മാതാക്കളില്‍ ഒരാളായ ചക്രവര്‍ത്തി രാമചന്ദ്ര അറിയിച്ചത്.
നിലവില്‍ ടര്‍ബോ എന്ന ചിത്രത്തിലാണ് മമ്മൂട്ടി അഭിനയിച്ചു കൊണ്ടിരിക്കുന്നത്. മാധര രാജയ്ക്ക് ശേഷം വൈശാഖും മമ്മൂട്ടിയും ഒന്നിക്കുന്ന ചിത്രം കൂടിയാണിത്. അതേസമയം, മമ്മൂട്ടിയുടെ യാത്ര 2 ഇന്ന് റിലീസ് ചെയ്തു കഴിഞ്ഞു. ഫസ്റ്റ് ഹാഫില്‍ മാത്രമാകും മമ്മൂട്ടി ചിത്രത്തില്‍ ഉണ്ടാകുക. ജീവയാണ് പ്രധാന കഥാപാത്രത്തെ അവതരിപ്പിക്കുന്നത്.