ഓടിക്കൊണ്ടിരിക്കെ നിയന്ത്രണംവിട്ട കാര്‍ കത്തി നശിച്ചു; ഡൈവ്രര്‍ അത്ഭുതകരമായി രക്ഷപ്പെട്ടു
അഞ്ചല്‍: ഓടിക്കൊണ്ടിരിക്കെ നിയന്ത്രണംവിട്ട കാർ കത്തി നശിച്ചു. ഡൈവ്രറും കാറുടമയുമായ അഞ്ചല്‍ താന്നി വിളവീട്ടില്‍ സിജു(26) അത്ഭുതകരമായി രക്ഷപെട്ടു.തിങ്കളാഴ്ച ഉച്ചക്ക് രണ്ടുമണിയോടെ അഞ്ചല്‍ തടിക്കാടിന് സമീപം പാങ്ങലിലാണ് സംഭവം. കരാറടിസ്ഥാനത്തില്‍ ഹിറ്റാച്ചി, ജെ.സി.ബി, ടിപ്പർ മുതലായവയുടെ പ്രവൃത്തികള്‍ ചെയ്തു വരുന്ന സിജു വർക്ക്സൈറ്റിലേക്ക് പോയ ഹിറ്റാച്ചി കയറ്റിയ ടിപ്പർ ലോറിക്ക് പിറകെ പോകവേയാണ് കാറില്‍ നിന്നു പുക ഉയരുന്നത് ശ്രദ്ധയില്‍പ്പെട്ടത്. ഒപ്പം ശ്വാസതടസ്സമുണ്ടാകുകയും ചെയ്തു. ഇതോടെ നിയന്ത്രണം വിട്ട കാർ ആളൊഴിഞ്ഞ പുരയിടത്തിലേക്ക് കയറി നില്‍ക്കുകയുണ്ടായി. ഈ സമയം കാറില്‍ നിന്നും പുറത്തുചാടിയാണ് സിജു രക്ഷപെട്ടത്.
തീ ആളിക്കത്തുന്നത് കണ്ട് ഓടിക്കൂടിയ പരിസരവാസികള്‍ അവശനായ സിജുവിനെ അഞ്ചലിലെ സ്വകാര്യ ആശുപത്രിയില്‍ പ്രവേശിപ്പിച്ചു. കൊല്ലം സ്വദേശിയായ സിജു ഏറെനാളായി അഞ്ചലിലാണ് താമസിച്ചു വരുന്നത്. പുനലൂരില്‍ നിന്നും ഫയർഫോഴ്സെത്തിയാണ് തീയണച്ചത്. കാർ പൂർണമായും കത്തിനശിച്ചു. ഷോർട്ട് സർക്യൂട്ടാണ് അപകട കാരണമെന്ന് സംശയിക്കുന്നു. അഞ്ചല്‍ പൊലീസ് മേല്‍നടപടിയെടുത്തു.