കോണ്‍ഗ്രസിലെ കാലുവാരല്‍ ആരോപിച്ച് പ്രവര്‍ത്തകര്‍ തമ്മില്‍ കൈയ്യാങ്കളിയും വാക്കേറ്റവും.
മലപ്പുറം: നന്നമ്പ്രയില്‍ കോണ്‍ഗ്രസിലെ കാലുവാരല്‍ ആരോപിച്ച് പ്രവര്‍ത്തകര്‍ തമ്മില്‍ കൈയ്യാങ്കളിയും വാക്കേറ്റവും. തെരഞ്ഞെടുക്കപെട്ട അഞ്ച് മെമ്പര്‍മാരുടെയും കോണ്ഗ്രസ് ഭാരവാഹികളുടെയും യോഗം ഇന്നലെ വൈകിട്ട് അഞ്ചിന് ചെറുമുക്ക് ടൗണ്‍ കോണ്‍ഗ്രസ്സ് ഓഫീസില്‍ ചേര്‍ന്നപ്പോഴാണ് കൈയ്യാങ്കളിയും പോര്‍വിളികളുമുയര്‍ന്നത്.
പഞ്ചായത്ത് വൈസ് പ്രസിഡന്റ് സ്ഥാനം സംബന്ധിച്ച ചര്‍ച്ചകള്‍ തുടങ്ങാനിരിക്കെ നന്നമ്പ്ര ഇരുപതാം വാര്‍ഡ് ഉള്‍പ്പെടെ ചില വാര്‍ഡുകളില്‍ ഡിസിസി സെക്രട്ടറിയുടെ അറിവോടെ ചില പ്രവര്‍ത്തകര്‍ പാര്‍ട്ടി സ്ഥാനാര്‍ത്ഥികളെ പരസ്യമായി രംഗത്തുവന്നെന്ന ആക്ഷേപമുയര്‍ന്നു. ഇക്കാര്യം ചൂണ്ടിക്കാട്ടിയതോടെ ഡിസിസി സെക്രട്ടറിയെ അനുകൂലിക്കുന്നവരും രംഗത്തെത്തി. ഇതോടെ ഇരുകൂട്ടരും തമ്മില്‍ ഏറെ നേരം കൈയ്യാങ്കളിയും വാക്കേറ്റവും നടന്നു.
തുടര്‍ന്ന് യോഗം മറ്റൊരു ദിവസത്തേക്ക് മാറ്റിവെച്ചു. പഞ്ചായത്തിലെ 21 വാര്‍ഡുകളില്‍ പന്ത്രണ്ടിടത്ത് മുസ്ലിം ലീഗ് , അഞ്ചിടത്ത് കോണ്ഗ്രസ്, ബിജെപി, വെല്‍ഫയര്‍, സ്വതന്ത്രന്‍ എന്നിങ്ങനെ ഓരോരുത്തര്‍ വീതവും ഒരു എല്‍ഡിഎഫ് സ്വതന്ത്രന്‍ എന്നിങ്ങനെയാണ് കക്ഷി നില. കഴിഞ്ഞ തവണ ഏഴിടത്ത് കോണ്ഗ്രസ് വിജയിച്ചിരുന്നു. ഇത്തവണ രണ്ടിടത്ത് പരാജപ്പെട്ടാന്‍ കാരണം ഒരു വിഭാഗം കോണ്ഗ്രസ് പ്രവര്‍ത്തകര്‍ കാലുമാറിയതാണെന്ന ആക്ഷേപം ശക്തമാണ്.