സോറിയാസിസ് നിയന്ത്രിക്കാൻ ഡയറ്റില്‍ ശ്രദ്ധിക്കേണ്ട കാര്യങ്ങള്‍
ചര്‍മ്മത്തിന്‍റെ പുറംപാളിയായ എപ്പിഡെര്‍മിസിന്‍റെ വളര്‍ച്ച ശരീരത്തിന്റെ ചില ഭാഗങ്ങളില്‍ മാത്രം വര്‍ധിക്കുന്ന ഓട്ടോ ഇമ്മ്യൂണ്‍ രോഗാവസ്ഥയാണ് സോറിയാസിസ്.തൊലി അസാധാരണമായ രീതിയില്‍ കട്ടി വയ്ക്കുന്ന അവസ്ഥയാണ് സോറിയാസിസില്‍ ഉണ്ടാകുന്നത്. ഇത് സാധാരണയായി കൈമുട്ടുകള്‍, കാല്‍മുട്ടുകള്‍, തലയോട്ടി എന്നിവയില്‍ പ്രത്യക്ഷപ്പെടുന്നു.
ചര്‍മ്മത്തില്‍ പാടുകള്‍ ഉണ്ടാകുകയും അതില്‍ ചുവപ്പോ കറുപ്പോ നിറത്തിലുള്ള അടയാളങ്ങള്‍ പ്രത്യക്ഷപ്പെടുകയും അസഹ്യമായ ചൊറിച്ചില്‍ ഉണ്ടാകുകയും ശല്‍ക്കങ്ങള്‍ ഉണ്ടാകുകയും ചെയ്യുന്നതാണ് സോറിയാസിസിന്‍റെ പ്രധാന ലക്ഷണങ്ങള്‍. നഖങ്ങളില്‍ നിറവ്യത്യാസം, ചെറിയ കുത്തുകള്‍, കേട് എന്നിവയും ചിലരില്‍ കാണാം. തൊലി വല്ലാതെ വരണ്ടുപോവുകയും ഇതിനിടയില്‍ വിള്ളല്‍ വന്ന് രക്തം വരികയും ചെയ്യുന്നത്, തൊലിപ്പുറത്ത് പൊള്ളുന്നത് പോലുള്ള അനുഭവം, ചൊറിച്ചില്‍, വേദന എന്നിവ അനുഭവപ്പെടുന്നതൊക്കെ ഇതിന്‍റെ ലക്ഷണമാകാം.
സോറിയാസിസ് രോഗത്തിന്‍റെ ക്യത്യമായ കാരണങ്ങള്‍ ഇന്നും വ്യക്തമല്ലെങ്കിലും പ്രതിരോധ സംവിധാനത്തിന്‍റെ തകരാറും ജനിതക ഘടകങ്ങളുമെന്നാണ് പൊതുവേ കരുതുന്നത്. സോറിയാസിസിന് ആധുനിക വൈദ്യശാസ്ത്രത്തില്‍ ഫലപ്രദമായ ചികിത്സാരീതികള്‍ ലഭ്യമാണ്. ജീവിതശൈലി മാറ്റങ്ങള്‍, ഭക്ഷണക്രമം എന്നിവ ഉപയോഗിച്ച്‌ സോറിയാസിസിന്‍റെ ലക്ഷണങ്ങളെ നിയന്ത്രിക്കാം. സോറിയാസിസ് നിയന്ത്രിക്കാൻ ഡയറ്റില്‍ ശ്രദ്ധിക്കേണ്ട കാര്യങ്ങള്‍ എന്തൊക്കെയാണെന്ന് നോക്കാം.
1. ഒമേഗ -3 ഫാറ്റി ആസിഡുകള്‍
ഫാറ്റി ഫിഷ് (സാല്‍മണ്‍, അയല, മത്തി), ഫ്ളാക്സ് സീഡുകള്‍, വാള്‍നട്സ് എന്നിവയില്‍ കാണപ്പെടുന്ന ഒമേഗ -3 ഫാറ്റി ആസിഡുകള്‍ക്ക് ശക്തമായ ആന്‍റി ഇന്‍ഫ്ലമേറ്ററി ഗുണങ്ങളുണ്ട്. സോറിയാസിസ് വീക്കവുമായി ബന്ധപ്പെട്ടിരിക്കുന്നതിനാല്‍, ഒമേഗ -3 ഫാറ്റി ആസിഡുകള്‍ ശരീരത്തില്‍ എത്തുന്നത് ചര്‍മ്മത്തിലെ വീക്കം കുറയ്ക്കാനും അസ്വസ്ഥതയെ തടയാനും സഹായിക്കും. ഈ ആരോഗ്യകരമായ കൊഴുപ്പുകള്‍ പതിവായി കഴിക്കുന്നത് ചർമ്മത്തിന്‍റെ ജലാംശവും ഇലാസ്തികതയും മെച്ചപ്പെടുത്തുകയും ചെയ്യും.
2. ആന്‍റി ഓക്‌സിഡന്‍റുകള്‍ അടങ്ങിയ ഭക്ഷണങ്ങള്‍
പഴങ്ങളും പച്ചക്കറികളും, പ്രത്യേകിച്ച്‌ വിറ്റാമിൻ സി (സിട്രസ് പഴങ്ങള്‍, കുരുമുളക്), വിറ്റാമിൻ ഇ (നട്സ്, വിത്തുകള്‍, അവക്കാഡോ) പോലുള്ള ആന്‍റിഓക്സിഡന്‍റുകളാല്‍ സമ്ബന്നമായ ഡയറ്റില്‍ ഉള്‍പ്പെടുത്തുന്നത് ചര്‍മ്മത്തിലെ വീക്കം കുറയ്ക്കാനും സോറിയാസിസ് കൈകാര്യം ചെയ്യാനും സഹായിക്കുന്നു.
3. സംസ്കരിച്ചതും മധുരമുള്ളതുമായ ഭക്ഷണങ്ങള്‍ പരിമിതപ്പെടുത്തുക
സംസ്കരിച്ച ഭക്ഷണങ്ങള്‍, ശുദ്ധീകരിച്ച പഞ്ചസാര, അനാരോഗ്യകരമായ കൊഴുപ്പുകള്‍ എന്നിവ വീക്കം വർദ്ധിപ്പിക്കുകയും സോറിയാസിസ് ലക്ഷണങ്ങള്‍ വഷളാക്കുകയും ചെയ്യും. ഉയർന്ന പഞ്ചസാര അടങ്ങിയവ കഴിക്കുന്നത് ഇൻസുലിൻ പ്രതിരോധത്തിന് കാരണമാകുന്നു. ഇത് വീക്കം, രോഗപ്രതിരോധ ശേഷി എന്നിവയുമായി ബന്ധപ്പെട്ടിരിക്കുന്നു. അതിനാല്‍ സംസ്കരിച്ചതും മധുരമുള്ളതുമായ ഭക്ഷണങ്ങള്‍ പരിമിതപ്പെടുത്തുക.
4. ധാരാളം വെള്ളം കുടിക്കുക
നിർജ്ജലീകരണം തടയാനും ചർമ്മത്തെ ഈർപ്പമുള്ളതാക്കാനും ധാരാളം വെള്ളം കുടിക്കുക. ദിവസവും കുറഞ്ഞത് 8-10 ഗ്ലാസ് വെള്ളമെങ്കിലും കുടിക്കുന്നത് ചർമ്മത്തിന്‍റെ ഇലാസ്തികത നിലനിർത്താനും മൊത്തത്തിലുള്ള ശരീരത്തിന്റെ ആരോഗ്യം സംരക്ഷിക്കാനും സഹായിക്കും.
5. ശുദ്ധീകരിച്ച ധാന്യങ്ങള്‍ക്ക് പകരം മുഴുധാന്യങ്ങള്‍ തിരഞ്ഞെടുക്കുക
ക്വിനോവ, ബ്രൗണ്‍ റൈസ്, ഓട്‌സ് തുടങ്ങിയ നാരുകളും അവശ്യ പോഷകങ്ങളും അടങ്ങിയ മുഴുധാന്യങ്ങള്‍ ഡയറ്റില്‍ ഉള്‍പ്പെടുത്തുക.
വൈറ്റ് ബ്രെഡ്, പാസ്ത തുടങ്ങിയ ശുദ്ധീകരിച്ച ധാന്യങ്ങള്‍ വീക്കം ഉണ്ടാക്കുകയും സോറിയാസിസ് ലക്ഷണങ്ങള്‍ വഷളാക്കുകയും ചെയ്യും. അതിനാല്‍ ശുദ്ധീകരിച്ച ധാന്യങ്ങള്‍ക്ക് പകരം മുഴുധാന്യങ്ങള്‍ തിരഞ്ഞെടുക്കുക.
6. പ്രോബയോട്ടിക് അടങ്ങിയ ഭക്ഷണങ്ങള്‍ ഉള്‍പ്പെടുത്തുക
പ്രോബയോട്ടിക് അടങ്ങിയ ഭക്ഷണങ്ങള്‍ ഡയറ്റില്‍ ഉള്‍പ്പെടുത്തുന്നതും സോറിയാസിസ് കൈകാര്യം ചെയ്യാന്‍ ഗുണം ചെയ്യും.
7. വിറ്റാമിൻ ഡി കൂടുതലുള്ള ഭക്ഷണങ്ങള്‍ കഴിക്കുക
രോഗപ്രതിരോധ പ്രവർത്തനത്തിലും ചർമ്മത്തിന്‍റെ ആരോഗ്യത്തിലും വിറ്റാമിൻ ഡി ഒരു പ്രധാന പങ്ക് വഹിക്കുന്നു. പാലുല്‍പ്പന്നങ്ങള്‍, മുട്ടയുടെ മഞ്ഞക്കരു, കൂണ്‍ തുടങ്ങിയ ഭക്ഷണങ്ങളില്‍ വിറ്റാമിൻ ഡി അടങ്ങിയിട്ടുണ്ട്. അതിനാല്‍ ഇവ ഡയറ്റില്‍ ഉള്‍പ്പെടുത്തുന്നത് ചർമ്മത്തിലെ വീക്കം കുറയ്ക്കാനും സോറിയാസിസിനെ നിയന്ത്രിക്കാനും സഹായിക്കും.
ശ്രദ്ധിക്കുക: മേല്‍പ്പറഞ്ഞ ലക്ഷണങ്ങള്‍ കാണുന്നപക്ഷം സ്വയം രോഗ നിർണയത്തിന് ശ്രമിക്കാതെ നിർബന്ധമായും ഡോക്ടറെ ‘കണ്‍സള്‍ട്ട്’ ചെയ്യുക. ഇതിന് ശേഷം മാത്രം രോഗം സ്ഥിരീകരിക്കുക.