കുവൈത്തില്‍ ഈ വര്‍ഷം റമദാൻ മാസത്തില്‍ നല്ല കാലാവസ്ഥ, വസന്തകാലത്തിന് സമാനമെന്ന് കാലാവസ്ഥ വിദഗ്ധൻ
കുവൈത്ത് സിറ്റി: ഈ വർഷം റമദാൻ മാസത്തിലെ കാലാവസ്ഥ പൊതുവെ മികച്ചതും വസന്തകാലത്തിന് സമാനവുമായിരിക്കുമെന്ന് കാലാവസ്ഥാ നിരീക്ഷകൻ ഈസ റമദാൻ.രാത്രിയില്‍ തണുത്ത കാലാവസ്ഥ തുടരുന്നതോടെയാണ് മാസം ആരംഭിക്കുന്നത്. പകല്‍ സമയത്ത് ക്രമേണ കാലാവസ്ഥ മിതമാകും.
ആദ്യ ആഴ്ചയില്‍ മേഘങ്ങള്‍ പ്രത്യക്ഷപ്പെടുകയും ഒറ്റപ്പെട്ട മഴയ്ക്കും മൂടല്‍മഞ്ഞിനും ഉയർന്ന ഈർപ്പത്തിനും സാധ്യതയുണ്ട്. അടുത്ത വാരാന്ത്യത്തില്‍ വടക്കുപടിഞ്ഞാറൻ കാറ്റ് വീശും. പകല്‍ സമയത്ത് രണ്ടാമത്തെയും മൂന്നാമത്തെയും ആഴ്ചകളില്‍ താപനില ക്രമേണ ഉയരാൻ തുടങ്ങും. രാത്രിയില്‍ തണുപ്പ് അനുഭവപ്പെടുകയും ഇടയ്ക്കിടെ മഴയ്ക്ക് സാധ്യതയുമുണ്ടാകും. റമദാൻ 21-ന് രാത്രിയും പകലും തുല്യമാകും. ഈ റമദാനിലെ കാലാവസ്ഥ വളരെ സ്വീകാര്യമായിരിക്കും. ഗള്‍ഫ് രാജ്യങ്ങളിലെയും ഇറാഖിലെയും മിക്ക പ്രദേശങ്ങളിലും കാലാവസ്ഥ മികച്ചതായിരിക്കുമെന്നും അദ്ദേഹം കൂട്ടിച്ചേർ‌ത്തു.