പാരമ്പര്യ വൈദ്യനെ തട്ടിക്കൊണ്ട് പോയി കൊലപ്പെടുത്തിയ കേസ്; ഹാരിസിന്റെ മൃതദേഹം വ്യാഴാഴ്ച പുറത്തെടുത്ത് റീ പോസ്റ്റ് പോസ്റ്റ്‌മോര്‍ട്ടം ചെയ്യും.
മലപ്പുറം: പാരമ്പര്യ വൈദ്യനെ തട്ടിക്കൊണ്ട് പോയി കൊലപ്പെടുത്തിയ കേസിലെ ഒന്നാം പ്രതി ഷൈബിന്‍ അഷ്റഫിന്റെ അബുദാബിയെ ബിസിനസ് പങ്കാളി ഹാരിസിന്റെ മൃതദേഹം വ്യാഴാഴ്ച പുറത്തെടുത്ത് റീ പോസ്റ്റ് പോസ്റ്റ്‌മോര്‍ട്ടം ചെയ്യും. നിലമ്പൂര്‍ ഒന്നാം ക്ലാസ് മജിസ്‌ട്രേറ്റ് കോടതിയുടെ ഉത്തരവിനെ തുടര്‍ന്നാണ് നടപടി.
ഹാരിസിനെ ഷൈബിന്റെ നേതൃത്വത്തില്‍ അബുദാബിയില്‍ വെച്ച് കൊലപ്പെടുത്തുകയായിരുന്നുവെന്ന ഹാരിസിന്റെ ബന്ധുക്കളുടെ പരാതിയെ തുടര്‍ന്നാണ് വീണ്ടും പോസ്റ്റ്‌മോട്ടം ചെയ്യാന്‍ കോടതി നിര്‍ദേശം നല്‍കിയത്. ഷൈബിന്‍ അഷ്റഫിന്റെ അബുദാബിയെ ബിസിനസ് പങ്കാളിയായിരിക്കെയാണ് കോഴിക്കോട് ഈസ്റ്റ് മലയമ്മ സ്വദേശി ഹാരിസ് ദുരൂഹ സാഹചര്യത്തില്‍ മരിച്ചത്.
2020 മാര്‍ച്ച് അഞ്ചിനാണ് കോഴിക്കോട് ഈസ്റ്റ് മലയമ്മ കുറുപ്പുംതൊടികയില്‍ തത്തമ്മപറമ്പില്‍ ഹാരിസ്, ഇയാളുടെ മാനേജര്‍ ചാലക്കുടി സ്വദേശി ഡാന്‍സി ആന്റണി എന്നിവരെ അബുദാബിയില്‍ കൊല്ലപ്പെട്ട നിലയില്‍ കണ്ടെത്തിയത്. യുവതിയെ കൊന്ന ശേഷം ഹാരിസ് കൈഞരമ്പ് മുറിച്ച് ആത്മഹത്യ ചെയ്തെന്നാണ് അന്ന് ഷൈബിന്‍ പറത്തിരുന്നത്.
മകന്റെ കൊലപാതകത്തിന്റെ ചുരുളഴിക്കണമെന്നാവശ്യപ്പെട്ട് ഹാരിസിന്റെ മാതാവുള്‍പ്പെടെയുള്ളവര്‍ നിലമ്പൂര്‍ പോലീസില്‍ പരാതി നല്‍കിയത്. ഹാരിസിന്റെ മാതാവ് സാറാബി, സഹോദരി ഹാരിഫ എന്നിവര്‍ നിലമ്പൂര്‍ പോലീസ് സറ്റേഷനിലെത്തി മൊഴി നല്‍കിയിരുന്നു.
ഹാരിസിന്റെ ഭാര്യയുമായുള്ള ഷൈബിന്റെ ബന്ധം ഹാരിസ് പിടികൂടിയ ശേഷമാണ് ഇരുവരും തമ്മില്‍ പ്രശ്‌നങ്ങള്‍ തുടങ്ങിയതെന്നാണ് ഹാരിസിന്റെ മാതാവിൻ്റെ ആരോപണം. ഹാരിസും ഷൈബിനും ആദ്യം സുഹൃത്തുക്കളായിരുന്നു. ഇരുവരും ഗള്‍ഫില്‍ ബിസിനസ് പങ്കാളികളായിരുന്നു. ഭാര്യയുമായുള്ള ബന്ധം പിടിച്ചതിനെ തുടര്‍ന്ന് തെറ്റിയ ഹാരിസിനെതിരെ ഷൈബിന്‍ നേരത്തെ ക്വട്ടേഷന്‍ നല്‍കിയിരുന്നുവെന്ന് ഹാരിസിന്റെ മാതാവ് സൈറാബി ആരോപിച്ചിരുന്നു.
ഹാരിസിന്റെ കൊലപാതകത്തില്‍ തങ്ങള്‍ക്ക് നീതി വേണമെന്നും അവര്‍ ആവശ്യപ്പെട്ടിരുന്നു. ഭാര്യ നസ്ലീനയുടെയും ഷൈബിന്റെയും ഭാഗത്തുനിന്ന് വധഭീഷണിയുണ്ടെന്ന് ഹാരിസ് പറയുമായിരുന്നുവെന്നും ഇവര്‍ പറയുന്നു. പണവും സ്വാധീനവുമുള്ള ആളാണ് ഷൈബിന്‍. ആയാളെ പേടിച്ചിട്ടാണ് ഇത്രയും നാള്‍ പരാതി നല്‍കാതിരുന്നതെന്ന് ഹാരിസിന്റെ കുടുംബം പറഞ്ഞിരുന്നത്. 2020 മാര്‍ച്ചിലാണ് ഹാരിസിനെ അബുദാബിയിലെ ഫ്‌ളാറ്റില്‍ മരിച്ചനിലയില്‍ കണ്ടെത്തിയത്. കേസിലെ കൂട്ടുപ്രതികള്‍ നല്‍കിയ പെന്‍ഡ്രൈവില്‍ ഹാരിസിനെ വകവരുത്താനായി തയ്യാറാക്കിയ പദ്ധതിയുടെ ബ്ലൂപ്രിന്റുകളും ഉണ്ടായിരുന്നു. ഇതോടെ, ഈ കേസും റീ ഓപ്പണ്‍ ചെയ്യാന്‍ പോലീസ് രംഗത്തുവന്നത്.
ഷൈബിന്റെ നിര്‍ദേശ പ്രകാരം കൂട്ടാളികള്‍ കൊല നടത്തിയെന്നാണ് പോലീസ് നിഗമനം. പ്രതികള്‍ക്ക് അബുദാബിയിലേക്കുള്ള ടിക്കറ്റും താമസ സൗകര്യവും ഒരുക്കിയത് ഷൈബിനാണ്. കൊലപാതകം പ്രത്യേക ആപ്പ് വഴി ഷൈബിന്‍ നിരീക്ഷിക്കുകയും ചെയ്തതായാണ് സൂചന. ഷൈബിന്‍ അഷ്റഫിന്റെ നേത്യത്വത്തില്‍ 13 അംഗ സംഘം ഹാരിസ് മരിക്കുന്നതിന് മുന്‍പ് വീട്ടില്‍ വന്ന് ഭീഷണിപ്പെടുത്തിയിരുന്നുവെന്ന് ബന്ധുക്കള്‍ പറഞ്ഞിരുന്നു. ഇത് സംബന്ധിച്ച് കുന്ദമംഗലം പോലീസിലും മുഖ്യമന്ത്രിക്കും ഹാരിസിന്റെ ബന്ധുക്കള്‍ പരാതി നല്‍കിയിരുന്നു.