1.70 കിലോ ഹഷീഷ് ഓയിലുമായി മൂന്നുപേര്‍ പിടിയില്‍
അരീക്കോട്: 1.70 കിലോ ഹഷീഷ് ഓയിലുമായി മൂന്നുപേർ എക്സൈസിന്റെ പിടിയില്‍. കൊണ്ടോട്ടി പാലപ്പെട്ടി സ്വദേശി പൂലാട്ട് വീട്ടില്‍ ജാബിർ (34), കോഡൂർ ചൂരപ്പുലാൻ വീട്ടില്‍ മജീദ് (40), കൊണ്ടോട്ടി പാലപ്പെട്ടി മുക്കോളി വീട്ടില്‍ അബ്ദുല്‍ അഷ്‌റഫ്‌ (40) എന്നിവരെയാണ് മഞ്ചേരി റെയ്ഞ്ച് എക്സൈസ് ഇൻസ്‌പെക്ടർ എച്ച്‌.വിനു അറസ്റ്റ് ചെയ്തത്.
എക്സൈസ് കമീഷണറുടെ ഉത്തര മേഖല സ്‌ക്വാഡും മഞ്ചേരി എക്സൈസ് റേഞ്ച് സംഘവും സംയുക്തമായാണ് പരിശോധന നടത്തിയത്. കൊണ്ടോട്ടി കേന്ദ്രീകരിച്ച്‌ മലപ്പുറം, കോഴിക്കോട് ജില്ലകളില്‍ ഹഷീഷ് ഓയില്‍ മൊത്തക്കച്ചവടം നടത്തുന്ന സംഘത്തിലെ പ്രധാനികളാണ് പ്രതികളെന്ന് എക്സൈസ് ഉദ്യോഗസ്ഥർ അറിയിച്ചു. ഇലക്ഷൻ സ്പെഷല്‍ ഡ്രൈവിന്റെ ഭാഗമായി ശക്തമായ പരിശോധയാണ് എക്സൈസ് സംഘം നടത്തിവരുന്നത്. കേസില്‍ കൂടുതല്‍ പേർ ഉള്‍പ്പെട്ടതായും അന്വേഷണത്തിലൂടെ മുഴുവൻ പ്രതികളെയും അറസ്റ്റ് ചെയ്യുമെന്നും മഞ്ചേരി എക്സൈസ് ഇൻസ്‌പെക്ടർ എച്ച്‌. വിനു പറഞ്ഞു.
ഹഷീഷ് ഓയില്‍ കടത്തിക്കൊണ്ടുവന്ന കാറും കസ്റ്റഡിയില്‍ എടുത്തു. വിപണിയില്‍ 10 ലക്ഷം രൂപ വിലവരുന്ന മയക്കുമരുന്നാണ് പിടികൂടിയത്. എക്സൈസ് കമീഷണർ സ്‌ക്വാഡ് അംഗങ്ങളായ എക്സൈസ് ഇൻസ്‌പെക്ടർ ടി. ഷിജുമോൻ, പ്രിവന്റീവ് ഓഫിസർ കെ. പ്രദീപ്‌ കുമാർ, സിവില്‍ എക്സൈസ് ഓഫിസർമാരായ നിതിൻ ചോമാരി, അഖില്‍ദാസ്, അരുണ്‍ പാറോല്‍, മഞ്ചേരി റേഞ്ച് ഓഫിസിലെ അസി. എക്സൈസ് ഇൻസ്‌പെക്ടർ കെ.എം. ശിവപ്രകാശ്, സിവില്‍ എക്സൈസ് ഓഫിസർമാരായ വി. സച്ചിൻദാസ്, ജിഷില്‍ നായർ, ടി. ശ്രീജിത്ത്‌, ഡ്രൈവർ ഉണ്ണികൃഷ്ണൻ എന്നിവരാണ് സംഘത്തില്‍ ഉണ്ടായിരുന്നത്.